အမေရိကန်ကစားသမားတွေအနေနဲ့ ကမ္ဘာ့ဖလားချန်ပီယံဆုရယူဖို့ ရည်မှန်းချက်ထားရမယ်လို့ ပိုချက်တီနို ပြောကြား
အမေရိကန်လက်ရွေးစင်အသင်းနည်းပြ ပိုချက်တီနိုက အမေရိကန်ကစားသမားတွေအနေနဲ့ ၂၀၂၆ ကမ္ဘာ့ဖလားပြိုင်ပွဲမှာ ချန်ပီယံဆုရယူဖို့ ရည်မှန်းချက်ထားရမယ်လို့ ပြောကြားခဲ့ပါတယ်။
၂၀၂၆ ကမ္ဘာ့ဖလားပြိုင်ပွဲကို အမေရိကန်က ကနေဒါ၊ မက္ကဆီကိုတို့နဲ့အတူ ပူးတွဲအိမ်ရှင်အဖြစ် လက်ခံကျင်းပမှာဖြစ်ပြီး အိမ်ရှင်အခွင့်အရေးရှိနေတာကြောင့် ပိုချက်တီနိုက အခုလိုပြောကြားခဲ့ခြင်းလည်း ဖြစ်ပါတယ်။
အမေရိကန်အသင်းဟာ ပထမဆုံးကျင်းပတဲ့ ၁၉၃၀ ကမ္ဘာ့ဖလားပြိုင်ပွဲမှာ တတိယဆုရရှိခဲ့တာက အမြင့်ဆုံးအောင်မြင်မှုဖြစ်ပြီး (၂၁)ရာစုမှာတော့ အမြင့်ဆုံးကွာတားဖိုင်နယ်သာ ရောက်ရှိဖူးပါတယ်။
''ကျွန်တော်တို့ ရည်မှန်းချက်ကြီးကြီးမားမား ထားရှိရမှာပါ။ ဒါဟာ အရေးကြီးတယ်လို့ ကျွန်တော် ယုံကြည်ပါတယ်။ ကာတာမှာ မော်ရိုကိုအသင်း လုပ်ဆောင်ခဲ့တာကို ကြည့်လိုက်ပါ(၂၀၂၂ ကမ္ဘာ့ဖလားမှာ မော်ရိုကိုအသင်း ဆီမီးဖိုင်နယ်ရောက်ခဲ့)။ သူတို့က အနိုင်ယူမယ်ဆိုတဲ့စိတ် အမြဲရှိနေခဲ့တာပါ။ ကျွန်တော်တို့လည်း ချန်ပီယံဆု ယူနိုင်ရမယ်ဆိုတဲ့စိတ် ရှိဖို့လိုပါတယ်။ အထူးသဖြင့် ကိုယ့်နိုင်ငံမှာ ကစားရမယ့်ပြိုင်ပွဲမှာပါ'' လို့ ပိုချက်တီနိုက ပြောကြားခဲ့ပါတယ်။
အာဂျင်တီးနားလူမျိုး ပိုချက်တီနိုဟာ ဥရောပထိပ်သီးကလပ်တွေဖြစ်တဲ့ စပါး၊ PSG နဲ့ ချယ်လ်ဆီးတို့ကို ကိုင်တွယ်ခဲ့ဖူးသူဖြစ်ပြီး အမေရိကန်လက်ရွေးစင်အသင်းကို ၂၀၂၄ စက်တင်ဘာမှာ စတင်ကိုင်တွယ်ခဲ့တာပါ။
ပိုချက်တီနိုဟာ အမေရိကန်အသင်းကို (၂၂)ပွဲကိုင်တွယ်ထားရာမှာ (၁၃)ပွဲနိုင်၊ (၂)ပွဲသရေ၊ (၇)ပွဲရှုံးရလဒ် ရရှိထားပြီး နောက်ဆုံးခြေစမ်းပွဲ(၅)ပွဲမှာ (၄)ပွဲနိုင်၊ (၁)ပွဲသရေကျထားကြောင်း သိရပါတယ်။
