ဂျီနီဗာတွင် အမေရိကန်အစီအစဉ်မှ အချက်အများစုကို ယူကရိန်း သဘောတူ
နိုဝင်ဘာလ ၂၃ ရက်နေ့က ဂျီနီဗာ၌ ပြုလုပ်သော အမေရိကန်နှင့် ယူကရိန်း ကိုယ်စားလှယ်အဖွဲ့များ အစည်းအဝေးတွင် ဝါရှင်တန်မှ အဆိုပြုထားသည့် ငြိမ်းချမ်းရေးအစီအစဉ်၏ အချက် ၂၈ ချက်အနက် အများစုကို ယူကရိန်းဖက်မှ သဘောတူညီခဲ့ကြကြောင်း RBC-Ukraine သတင်းဌာနက ၎င်း၏သတင်းရင်းမြစ်များကို ကိုးကား၍ ဖော်ပြသည်။
သတင်းအေဂျင်စီ၏ ဖော်ပြချက်အရ ယူကရိန်းလက်နက်ကိုင်တပ်ဖွဲ့ အရွယ်အစားကို လျှော့ချရန်၊ အကျဉ်းသားလဲလှယ်ရေးနှင့် ဇာပိုရိုဇီးယား နျူကလီးယားစွမ်းအင်သုံး ဓာတ်အားပေးစက်ရုံတို့နှင့် သက်ဆိုင်သည့် အချက်များကို သဘောတူညီပြီးဖြစ်ကြောင်း သိရသည်။
ကျန်ရှိနေသော အချက်အချို့ကိုမူ လာမည့် အမေရိကန်သမ္မတ ဒေါ်နယ်လ်ထရမ့်နှင့် ဗော်လိုဒီမာ ဇယ်လန်းစကီးတို့၏ တွေ့ဆုံပွဲတွင် ဆွေးနွေးရန် ချန်ထားခဲ့သည်။ ယင်းတို့တွင် ယူကရိန်းပိုင်နက် နယ်မြေတစ်စိတ်တစ်ပိုင်းကို စွန့်လွှတ်ရန်နှင့် နေတိုး (NATO) သို့ မပူးပေါင်းရေးကို ယူကရိန်းဖွဲ့စည်းပုံ အခြေခံဥပဒေတွင် ပြဌာန်းထည့်သွင်းရန် စသည့် အချက်များ ပါဝင်သည်။
အစီအစဉ်၏ ကျန်ရှိနေသော အချက်များကို အပြီးသတ်ရန်အတွက် ထရမ့်နှင့် ဇယ်လန်းစကီးတို့ တွေ့ဆုံမည့်ရက်ကို တိတိကျကျ မဆုံးဖြတ်ရသေးသော်လည်း ယခုအပတ် သို့မဟုတ် နောက်အပတ်တွင် ဖြစ်နိုင်ဖွယ်ရှိသည်ဟု ယာယီသတ်မှတ်ထားသည်။
