ဗီယက်နမ် ရေဘေး လူ ၉၀ ကျော်သေပြီး ၁၂ ယောက်ပျောက်နေ
ဗီယက်နမ်နိုင်ငံမှာ ရက်ပေါင်းများစွာ မိုးသည်းထန်စွာရွာသွန်းပြီး ရေကြီးရေလျှံမှုနဲ့ မြေပြိုမှုတွေကြောင့် သေဆုံးသူ ၉၀ ကျော်ရှိလာပြီး ၁၂ ယောက် ပျောက်ဆုံးနေဆဲဖြစ်တယ်လို့ တာဝန်ရှိသူတွေက ပြောပါတယ်။
ရေဘေးကြောင့် နိုင်ငံတဝန်းမှာ အိမ်ခြေ တသိန်းရှစ်သောင်းကျော် ပျက်စီးခဲ့ပြီး မွေးမြူရေးတိရစ္ဆာန် သုံးသန်းကျော် ရေထဲမျောပါခဲ့ပြီး ဒေါ်လာသန်းရာနဲ့ချီပြီး ပျက်ဆီးဆုံးရှုံးမှုတွေ ဖြစ်ခဲ့တယ်လို့ ဗီယက်နမ်အစိုးရက ပြောပါတယ်။
တောင်တန်းဒေသတွေဖြစ်တဲ့ ဒက်လက်ခ် ပြည်နယ်မှာ နိုဝင်ဘာ ၁၆ ရက်နောက်ပိုင်း သေဆုံးသူ ၆၀ ကျော် ရှိခဲ့ပြီး အဆိုးရွားဆုံးထိခိုက်ခဲ့ပါတယ်။ မုန်တိုင်း ကယ်လ်မေဂီနဲ့ဘူအလွိုင် တို့ဟာ ရက်သတ္တပတ်အနည်းငယ်အတွင်း ဆက်တိုက်ဝင်ရောက်တိုက်ခတ်ပြီးနောက် လက်ရှိ ရေကြီးရေလျှံမှုဟာ ဆိုးရွားတဲ့ သဘာ၀ဘေးတခုလည်းဖြစ်ပါတယ်။
နိုဝင်ဘာ ၂၂ ရက်မှာ လူပေါင်း နှစ်သိန်းခွဲကျော် လျှပ်စစ်ဓာတ်အား ပြတ်တောက်ခဲ့ပြီး အဓိက အဝေးပြေးလမ်းမကြီးတွေနဲ့ ရထားလမ်းတွေ ပိတ်ဆို့ခဲ့တယ်လို့ တာဝန်ရှိသူတွေက ပြောပါတယ်။ အဆိုးရွားဆုံး ထိခိုက်ခံရတဲ့ ဒေသတွေမှာ စစ်တပ်နဲ့ ရဲတပ်ဖွဲ့က ကူညီကယ်ဆယ်ရေးတွေ လုပ်ဆောင်နေပါတယ်။
ဗီယက်နမ်တောင်ပိုင်းနဲ့ အလယ်ပိုင်းရှိ ပြည်နယ်ငါးခုဖြစ်တဲ့ ကွမ်ငိုင်း၊ ဂျာလိုင်၊ ဒတ်လက်၊ ခန်းဟွာဈ လမ်ဒုံတို့မှာ ရေကြီးရေလျှံမှု အဆိုးရွားဆုံး ဖြစ်ပွားခဲ့တယ်လို့ တာဝန်ရှိသူတွေက ပြောပါတယ်။
တောင်အာဖရိကမှာ ဂျီ-၂၀ ထိပ်သီးအစည်းအဝေး တက်ရောက်နေတဲ့ ဝန်ကြီးချုပ် ဖမ်မင်းချင်ဟာ နိုဝင်ဘာ ၂၂ ရက်မှာ အွန်လိုင်းအရေးပေါ်အစည်းအဝေးတခုကို ပြုလုပ်ခဲ့ပြီး ကူညီကယ်ဆယ်ရေးတွေအတွက် တာဝန်ရှိသူတွေကို ညွှန်ကြားခဲ့ပါတယ်။
