ဟယ်ရီပေါ်တာဂိုးသွင်းအောင်ပွဲမှုအတွက် တရားရင်ဆိုင်ရမယ့် ဖီနာဘာချီစတား
=================

ဖီနာဘာချီစတားကီရမ်အက်တူကိုဂလူဟာ ဟယ်ရီပေါ်တာဂိုးသွင်းအောင်ပွဲခံမှုအတွက် ရုပ်ရှင်ကုမ္ပဏီကြီးတစ်ခုရဲ့ တရားရင်ဆိုင်လာရတော့မှာ ဖြစ်ပါတယ်။
အသက် ၂၇ နှစ်ရှိ ဖီနာဘာချီတိုက်စစ်သမားကို Warner Bros က တရားစွဲဆိုလာတာပါ။ Warner Bros ဟာ လွန်ခဲ့တဲ့ လေးနှစ်အတွင်း ဂိုးသွင်းပြီးနောက် ဟယ်ရီပေါ်တာကဲ့သို့ မှော်တုတ်တံကို ဝေ့ယမ်းအောင်ပွဲခံကာ မူပိုင်ခွင့် ချိုးဖောက်မှုအတွက် အက်တူကိုဂလူအား တရားစွဲလာပါတယ်။
တူရကီလက်ရွေးစင်အသင်းအတွက် ၄၉ ပွဲကစားထားတဲ့ ဘင်ဖီကာတိုက်စစ်သမားဟောင်းဟာ ယင်းဂိုးသွင်းအောင်ပွဲခံမှုကြောင့် ပရိသတ်များရဲ့ “Kerem Potter” ဆိုပြီး ချစ်စနိုးအမည်ပြောင်ပေးခြင်းပါ ခံထားရပါတယ်။
ဒါ့အပြင် ပရိသတ်အချို့ကလည်း သူ့ကို တူရကီမှော်ဆရာလို့လည်း ခေါ်ဝေါ်ကြပါသေးတယ်။
ဟောလီးဝုဒ်ရုပ်ရှင်ကုမ္ပဏီ Warner Bros ဟာ တူရကီတွင် Harry Potter ၊ “Hogwarts” နှင့် “Gryffindor” တို့အား မူပိုင်ခွင့် ရယူထားပါတယ်။
Warner Bros က အက်တူကိုဂလူမှာ ကုမ္ပဏီရဲ့ ခွင့်ပြုချက် မရယူဘဲ အသုံးပြုမှုနှင့်အတူ တရားစွဲဆိုလာခြင်း ဖြစ်ကြောင်း ဆိုထားပါတယ်။
အမေရိကန်ရုပ်ရှင်ကုမ္ပဏီဟာ အက်တူကိုဂလူရဲ့ အင်စတာဂရမ်နှင့် တွစ်တာပို့စ်တို့မှ Screenshots များ၊ ၎င်းတို့ရဲ့ မူပိုင်ခွင့်တင်ထားမှုများကို တရားရုံးတွင် တင်ပြကာ တရားစွဲဆိုလာတာလည်း ဖြစ်ပါတယ်။
ဒါ့အပြင် အက်တူကိုဂလူဟာ ဆိုရှယ်မီဒီယာတွင် တင်တဲ့ ပို့စ်များတွင် ဟယ်ရီပေါ်တာ ဇာတ်ကားမှ “Hedwig’s Theme” သီချင်းကို နောက်ခံအဖြစ် အသုံးပြုကာ တင်ထားပါသေးတယ်။
Warner Bros ဟာ အက်တူကိုဂလူဘက်က ၎င်းတို့ ခွင့်ပြုချက် မရယူဘဲ မူပိုင်ခွင့် ချိုးဖောက်ထားတဲ့ သက်သေအထောက်အထားအားလုံးကို တရားရုံးတင် တင်ပြထားကြောင်းလည်း သိရပါတယ်။
တဖက်တွင် ဖီနာဘာချီစတားရဲ့ အေးဂျင့်က "ကီရမ်အက်တူကိုဂလူက ၁၉၉၈ ခုနှစ်ဖွားပါ။ ဟယ်ရီပေါ်တာ ဇာတ်ကောင်က ၁၉၉၇ ခုနှစ်မှာ ကမ္ဘာအနှံစတင် ကျော်ကြားလာပါတယ်။ အက်တူကိုဂလူအနေနဲ့ ငယ်စဉ်ကတည်းက ချစ်မြတ်နိုးခဲ့တဲ့ ဇာတ်ကောင်ရဲ့ လွှမ်းမိုးမှုနဲ့ ဂိုးသွင်းအောင်ပွဲခံတာ တရားစွဲသင့်တဲ့ အရာလို့ မမြင်ပါဘူး"လို့ ဆိုထားပါတယ်။