တရုတ်တွင် ဂျပန်ရုပ်ရှင်များ ပြသမှုကို ရပ်ဆိုင်း

တိုကျိုနှင့် ပေကျင်းအကြား နက်ရှိုင်းလာသော အငြင်းပွားမှုတစ်ခုကြောင့် ရုပ်ရှင်ဖြန့်ဖြူးသူများသည် တရုတ်နိုင်ငံတွင် အနည်းဆုံး ဂျပန်ရုပ်ရှင်နှစ်ကားပြသမှုကို ရပ်ဆိုင်းလိုက်ကြောင်း နိုင်ငံပိုင်ရုပ်သံ စီစီတီဗီက ပြောကြားခဲ့သည်။
ဂျပန်ဝန်ကြီးချုပ် ဆနားအဲတာကာအိချီ၏ ထိုင်ဝမ်နှင့် ပတ်သက်သော ပြောစကားများကြောင့် တရုတ်နိုင်ငံက ပြင်းထန်စွာ တုန့်ပြန်ခဲ့ပြီး နှစ်နိုင်ငံအကြား နှစ်ပေါင်းများစွာအတွင်း အပြင်းထန်ဆုံး သံတမန်ရေးပဋိပက္ခစတင်ခဲ့အပြီး နှစ်ပတ်အကြာတွင် ယခုကဲ့သို့ ရပ်ဆိုင်းမှုဖြစ်ပေါ်လာခြင်းဖြစ်သည်။
လာမည့်ရက်သတ္တပတ်များတွင် ရုံတင်ပြသရန် မူလက စီစဉ်ထားသည့် Crayon Shin-chan the Movie: Super Hot! Scorching Kasukabe Dancers နှင့် ရုပ်ပြမှ ရုပ်ရှင်အဖြစ် ပြောင်းလဲရိုက်ကူးထားသော Cells at Work! အပါအဝင် ဂျပန်ရုပ်ရှင်အချို့သည် တရုတ်ပြည်မကြီးတွင် ပြသတော့မည်မဟုတ်ကြောင်း စီစီတီဗီက ပြောကြားခဲ့သည်။
ကာတွန်းရုပ်ရှင် Demon Slayer: Infinity Castle သည် အစပိုင်းတွင် ဝင်ငွေကောင်းခဲ့သော်လည်း တာကာအိချီ၏ မှတ်ချက်များကြောင့် တရုတ်ပရိသတ်များက လွန်စွာမကျေမနပ်ဖြစ်ခဲ့ပြီးနောက် ၎င်း၏ လက်မှတ်ရုံ၌ အရောင်းကျသွားခဲ့ကြောင်းလည်း စီစီတီဗီက တနင်္လာနေ့အနှောင်းပိုင်းတွင် ဖော်ပြခဲ့သည်။
ရုပ်ရှင်တင်သွင်းသူများနှင့် ဖြန့်ဖြူးသူများသည် ဈေးကွက်၏ တုန့်ပြန်မှုကို နားထောင်ရန်၊ ပရိသတ်များ၏ ခံစားချက်ကို လေးစားရန် ရွေးချယ်ခဲ့ကြပြီး လာမည့်ရုပ်ရှင်များရုံတင်ပြသမှုကို ရွှေ့ဆိုင်းခဲ့ကြသည်ဟု စီစီတီဗီက ပြောကြားခဲ့သည်။
တစ်ချိန်တည်းမှာပင် ဂျပန်နိုင်ငံသို့ ခရီးမသွားကြရန် ပေကျင်းက နိုင်ငံသားများကို အကြံပြုခဲ့ပြီးနောက် တရုတ်လေကြောင်းလိုင်းများတွင် စနေနေ့မှစကာ ဂျပန်ခရီးစဉ်လက်မှတ်ဖျက်သိမ်းမှု ၄၉၁,၀၀၀ ခန့်ရှိခဲ့ပြီး ကြိုတင်ဘွတ်ကင်စုစုပေါင်း၏ ၃၂ ရာခိုင်နှုန်းဖြစ်ကြောင်း ဝါရင့် လေကြောင်းခရီးစဉ်သုံးသပ်သူတစ်ဦးက ပြောကြားခဲ့သည်။
လေယာဉ်ခရီးစဉ် ဖျက်သိမ်းမှုသည် ဘွတ်ကင်အသစ်မှာယူမှုများထက် ၂၇ ဆ ပိုများပြီး ဘေးကင်းလုံခြုံမှုအတွက် စိုးရိမ်ပူပန်မှုသည် ခရီးစဉ်ဖျက်သိမ်းမှုအတွက် အဓိကအချက်အဖြစ်နေကြောင်း လေ့လာသူ လီဟန်မင်းက ပြောကြားခဲ့သည်။