မြန်မာ-တရုတ် လူဝင်မှုဆိုင်ရာ ပူးပေါင်းရေး MoU လက်မှတ်ရေးထိုး
---------------------------------
တရုတ်နိုင်ငံမှာ အကြောင်းအမျိုးမျိုးကြောင့် ဖမ်းဆီးခံရတဲ့ မြန်မာနိုင်ငံသားတွေကို ဥပဒေနဲ့အညီ ပြန်လည် စိစစ်ပြီး နေရပ်ကို ပြန်လည်ပို့ဆောင်နိုင်ရေးနဲ့ ပတ်သက်လို့ နှစ်နိုင်ငံ လူဝင်မှုကြီးကြပ်ရေးဆိုင်ရာ ပူးပေါင်းဆောင်ရွက်ရေး နားလည်မှု စာချွန်လွှာ (MoU) လက်မှတ်ရေးထိုးခဲ့တယ်လို့ သိရပါတယ်။
နိုဝင်ဘာ ၁၇ ရက်၊ ညနေပိုင်းက လူဝင်မှုကြီးကြပ်ရေး နှင့်ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးမြင့်ကြိုင်နဲ့ တရုတ်နိုင်ငံ ပြည်သူ့လုံခြုံရေး ဝန်ကြီးဌာန၊ ဒုတိယဝန်ကြီး မစ္စတာ ဝမ်ကျိကျောင်းတို့ဟာ တရုတ်နိုင်ငံ ပြည်သူ့ လုံခြုံရေးဝန်ကြီးဌာန၊ အမျိုးသားလူဝင်မှု ကြီးကြပ်ရေးဌာနချုပ် (NLA) အစည်းအဝေးခန်းမမှာ တွေ့ဆုံ ဆွေးနွေး ပြီးနောက် MoU လက်မှတ်ရေးထိုးခဲ့တာပါ။
တွေ့ဆုံဆွေးရာမှာတော့ နှစ်နိုင်ငံ နယ်စပ်ဂိတ်တွေမှာ လူဝင်မှု စစ်ဆေးရေးစနစ်တွေ အဆင့်မြှင့်တင်နိုင်ရေးနဲ့ လူဝင်မှု ကြီးကြပ်ရေးဆိုင်ရာ လုပ်ငန်းတွေ ပိုမိုတိုးမြှင့်ဆောင်ရွက်နိုင်ရေး၊ နှစ်နိုင်ငံ နယ်စပ်တွေမှာ တရားဝင် ဝင်ထွက် သွားလာမှု ရှိစေရေးနဲ့ တရားမဝင် ဝင်ထွက်မှု မရှိစေရေးအတွက် အပြန်အလှန် ညှိနှိုင်းပူးပေါင်းဆောင်ရွက်ရေး၊ နှစ်နိုင်ငံ လူဝင်မှု ကြီးကြပ်ရေးဆိုင်ရာ သတင်းအချက်အလက်တွေ အပြန်အလှန် ဖလှယ်ရေး၊ လူကုန်ကူးမှု တိုက်ဖျက်ရေး၊ အွန်လိုင်း လောင်းကစားမှု လုပ်ငန်းတွေ ပူးပေါင်းတိုက်ဖျက်ရေး၊ နှစ်နိုင်ငံ နယ်စပ်ဒေသ တည်ငြိမ်အေးချမ်းရေးနဲ့ အပြန် အလှန် ဝင်ထွက်သွားလာမှုတွေ အဆင်ပြေ ချောမွေ့စေရေးအတွက် တွေ့ဆုံ ညှိနှိုင်းမှုတွေ ဆောင်ရွက်ရေးနဲ့ စပ်လျဉ်းပြီး အမြင်ချင်း ဖလှယ်ဆွေးနွေးခဲ့ပါတယ်။
အဲဒီနောက် လူဝင်မှုကြီးကြပ်ရေး ဦးစီးဌာန၊ ညွှန်ကြားရေးမှူးချုပ် ဦးရဲထွန်းဦးနဲ့ အမျိုးသား လူဝင်မှုကြီးကြပ် ရေးဌာနချုပ်၊ ဒုတိယဌာနချုပ်မှူးတို့ဟာ နှစ်နိုင်ငံ လူဝင်မှု ကြီးကြပ်ရေး ဆိုင်ရာ ပူးပေါင်းဆောင်ရွက်ရေး နားလည်မှု စာချွန် လွှာ(MoU) လက်မှတ်ရေးထိုးကြပြီး အပြန်အလှန် လဲလှယ်ခဲ့ကြပါတယ်။
မြန်မာ-တရုတ် နှစ်နိုင်ငံအကြား လူဝင်မှုကြီးကြပ်ရေးလုပ်ငန်းတွေ ပိုမိုတိုးမြှင့်ဆောင်ရွက်ရေးနဲ့ တရားမဝင် ဝင်ထွက် သွားလာမှု လျော့နည်းပပျောက်ရေး၊ အွန်လိုင်းလိမ်လည်မှု လုပ်ငန်းတွေ ပူးပေါင်းတိုက်ဖျက်ရေး စတဲ့ ရည်ရွယ်ချက် တွေနဲ့ တရုတ်ပြည်သူ့ သမ္မတနိုင်ငံ အစိုးရရဲ့ ဖိတ်ကြားချက်အရ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်ဟာ နိုဝင်ဘာ ၁၄ ရက်ကနေ ၁၈ ရက်အထိ တရုတ်နိုင်ငံ၊ ရှန်ကျန်းနဲ့ ပေကျင်းမြို့ တွေကို အလုပ်သဘော လေ့လာရေးခရီး သွားရောက်ခဲ့တာဖြစ်ပါတယ်။
