လီဗာပူးရဲ့ လာမယ့်ပွဲတွင် ပါဝင်ကစားနိုင်ခြေ ၀.၁ ရာခိုင်နှုန်းသာ ရှိနေတဲ့ ပေါင် ၁၂၅ သန်းတန် တိုက်စစ်မှူး
=====================

အလက်ဇန္ဒားအီဆက်ခ်ရဲ့ လီဗာပူးကစားသမားဘဝက ညက်ညောနေခြင်း မရှိဘဲ ခရောင်းလမ်းကို ဖြတ်သန်းနေရပါတယ်။
လီဗာပူးနည်းပြအန်းဆလော့ဟာ လာမယ့် အက်စတွန်ဗီလာနှင့် ပရီးမီးယားလိဂ်ပွဲစဉ်မတိုင်မီ ဆွီဒင်တိုက်စစ်မှူးရဲ့ ဒဏ်ရာအခြေအနေနှင့်ပတ်သက်ပြီး ဖွင့်ဟမှု ပြုလုပ်လာခဲ့ပါတယ်။

အလက်ဇန္ဒားအီဆက်ခ်ဟာ နွေရာသီ အပြောင်းအရွှေ့ဈေးကွက်နောက်ဆုံးနေ့တွင် နယူးကာဆယ်ကနေ ဗြိတိန်စံချိန်တင်ပြောင်းရွှေ့ကြေး ပေါင် ၁၂၅ သန်းဖြင့် ပြောင်းလာပြီးတဲ့နောက် အန်ဖီးလ်မှာ မျှော်လင့်ခြင်း ကြီးကြီးမားမားထားခြင်းခံလာရသူလည်း ဖြစ်ပါတယ်။

ဒါပေမယ့် အီဆက်ခ်ရဲ့ လီဗာပူးကစားသမားဘဝအစက ကြံ့ခိုင်မှုပြဿနာရှိနေမှုနှင့်အတူ အထနှေးနေခဲ့ပါတယ်။

ပိုပြီးတော့ ဆိုးရွားလာတာကတော့ ဖရန့်ဖတ်ကို ၅-၁ ဖြင့် အနိုင်ရတဲ့ပွဲမှာ ဒဏ်ရာရရှိကာ လူစားလဲခဲ့ရပြီးနောက်မှာ လီဗာပူးအတွက် ကစားလာနိုင်ခဲ့ခြင်း မရှိပါဘူး။

လီဗာပူးရဲ့ အခြေအနေက ပြဿနာချောက်ကမ်းပါးသို့ ပြုကျဖို့ သီသီလေးပဲ လိုတော့တဲ့ အခြေဆိုက်နေပါတယ်။

ဗုဒ္ဓဟူးနေ့တုန်းက အိမ်ကွင်းမှာ ပဲလေ့စ်ကို ၃-၀ ဂိုးနဲ့ ရှုံးနိမ့်ပြီး ခါရာဘောင်ဖလားကနေ ထွက်လိုက်ရပြီးတဲ့နောက် နောက်ဆုံး ပြိုင်ပွဲအရပ်ရပ် ၇ ပွဲမှာ ၆ ပွဲအထိ ရှုံးထားပါတယ်။

ပရီးမီးယားလိဂ်မှာလည်း ၄ ပွဲဆက်တိုက် အရှုံးနှင့် ကြုံရမှုနှင့်အတူ ထိပ်ဆုံးက အာဆင်နယ်နဲ့ ရမှတ် ၇ မှတ်အထိ ကွာဟလာပါတယ်။

ရေနစ်သူ ဝါးကူထိုးဆိုသလို ဒီလို အချိန်မျိုးမှာ ဒဏ်ရာပြဿနာနှိပ်စက်မှုဒဏ်ကိုလည်း အန်းဆလော့တစ်ယောက် အလူးအလဲ ခံလာရပါတယ်။

အလက်ဇန္ဒားအီဆက်ခ်အပါအဝင် လီဗာပူးရဲ့ အဓိကကစားသမားအချို့တို့ဟာ စနေနေ့ည ဗီလာနှင့်ပွဲကို လွဲချော်လာပါမယ်။
အဓိကဂိုးသမားအလစ်ဆင်ဘက်ကာ၊ ညာနောက်ခံလူဂျီရီမီဖရမ်းပေါင်အပြင် ကာတစ်ဂျုံးစ်တို့ လွဲလာပါမယ်။ ဒါ့အပြင် ဆယ်ကျော်သက်နောက်ခံလူဂျီယိုဗန်နီလီယွန်နီကလည်း တစ်ရာသီလုံးနားထားရပါတယ်။

ဒါပေမယ့် သတင်းကောင်းကတော့ ရိုင်ယန်ဂရာဗန်ဘစ်ရှ်မှာ လေ့ကျင့်ခန်းအပြည့်အဝ ဆင်းလာနိုင်ကာ ဗီလာနှင့်ပွဲမှာ ပါဝင်လာမယ့်သတင်း ဖြစ်ပါတယ်။

ဒတ်ချ်ကွင်းလယ်ကစားသမားဟာ ယူနိုက်တက်ရှုံးပွဲတွင် ခြေကျင်းဝတ်ဒဏ်ရာ ရရှိပြီးတဲ့နောက် လီဗာပူးရဲ့ပွဲ ၃ ပွဲကို လွဲချော်ခဲ့ပါတယ်။ ယင်း ၃ ပွဲမှာ လီဗာပူးတို့ ၇ ဂိုးအထိ ပေးခဲ့ရပါတယ်။

ဆလော့က "ရိုင်ယန်ဟာ မနေ့တုန်းက ကျွန်တော်တို့နဲ့အတူ လေ့ကျင့်ခန်းဆင်းခဲ့တယ်။ အခြားနှစ်ယောက်(အီဆက်ခ်နဲ့ ဂျုံးစ်)တို့ကတော့ မလုပ်သေးဘူး။ ဒဏ်ရာအဆုံးသတ်ရောက်ခါနီးချိန်မှာ အချို့အရာတွေ နှေးလာတတ်သလို မြန်လာတတ်တယ်။ ရိုင်ယန်ကတော့ မနေ့က ကျွန်တော်တို့နဲ့အတူ လေ့ကျင့်ခန်းဆင်းခဲ့တယ်။ ဒီနေ့လည်း ဆင်းဦးမယ်။ ပွဲထွက်ကစာနိုင်မလား ကြည့်ရမယ်။ အခြားနှစ်ယောက်ကတော့ စနေနေ့ လူစာရင်းမှာ မပါဝင်ဖို့ ၉၉.၉ ရာခိုင်နှုန်းသေချာတယ်"လို့ ပြောကြားလာပါတယ်။
ဆလော့ဟာ ကစားသမားများ ပွဲပန်းမှု မဖြစ်စေရန်အတွက် ပဲလေ့စ်ရှုံးပွဲတွင် တစ်သင်းလုံးကို အပြောင်းအလဲ ပြုလုပ်ခဲ့ပါတယ်။

တဖက်တွင် ဒတ်ချ်လူမျိုးနည်းပြက ပွဲဆက်များမှု၊ ဒဏ်ရာပြဿနာများကြောင့် အသင်းရဲ့ ခြေစွမ်းနိမ့်ကျလာခြင်း ဖြစ်ကြောင်းနှင့် အသင်းရဲ့ လူအင်အားအခြေအနေအပေါ် ကျေနပ်ကြောင်း ဆိုသွားပါတယ်။

အန်းဆလော့ဟာ အီဆက်ခ် ဒဏ်ရာရရှိနေမှုနှင့်အတူ တိုက်စစ်တွင် ဟူဂိုအီကီတီကီကို ဆက်လက် အသုံးပြုလာပါမယ်။
ပြိုင်ဘက် ဗီလာမှာလည်း အင်ဒရီဂါစီယာ၊ ယူရီတီလီမန်း၊ အီလီမီယာနိုဘူအန်ဒီယာတို့ ဒဏ်ရာရရှိနေတဲ့ ပြဿနာကြုံနေရပါတယ်။ ဒါ့အပြင် အင်္ဂလန်စတားဟာဗေးအီးလီးယော့မှာလည်း မိခင်ကလပ် လီဗာပူးနှင့်ပွဲမှာ ပါဝင်ကစားလာနိုင်မှာ မဟုတ်ပါဘူး။