အရင်တုန်းက ကျွန်မဟာ ဗိုက်အောင့်ဗိုက်နာ ခဏခဏ ဖြစ်တတ်ပြီး ဘာစားစား အစာမကြေ၊ လေထိုးလေအောင့် မကြာခဏ ဖြစ်တတ်သူတစ်ယောက်ပါ။ လက်တွေ၊ ခြေတွေလည်း အေးတတ်ပြီး တစ်ခါတစ်လေ လေချုပ်လွန်းလို့ ရင်ဘတ်အောင့်တဲ့အထိတောင် ဖြစ်ဖူးပါတယ်။
အဲဒီလို ဖြစ်နေချိန်မှာ အမေက ဂျင်းပြုတ်ရည် သောက်ကြည့်ဖို့ ပြောပါတယ်။ အစတုန်းက ဂျင်းက စပ်မှာစိုးလို့ မကြိုက်ခဲ့ပါဘူး။ ဒါပေမဲ့ ကိုယ်တိုင်သာ ပြုတ်သောက်ကြည့်လိုက်တော့ ပျားရည်လေး နည်းနည်းထည့်လိုက်တာ "အဲ......!" ထင်ထားတာထက်တောင် ပိုပြီး အရသာရှိနေတယ်။
🍵 ဂျင်းပြုတ်ရည် အိမ်မှာ အလွယ်တကူ လုပ်သောက်နည်း
• ဂျင်းအစိမ်းကို ပါးပါးလှီးထားတာ (၇) ပြားမှ (၁၀) ပြားခန့်
• ရေ ၅၀၀ မီလီလီတာ (ခန့်မှန်းခြေ ရေ ၂ ခွက်)
• ဂျင်းထည့်ပြီး ၅ မိနစ်မှ ၁၀ မိနစ်ခန့် ဆူအောင်တည်ပါ။
• ချိုချင်ရင် ပျားရည်နည်းနည်း ထည့်ပြီး သောက်နိုင်ပါတယ်။
နွေးနွေးလေး သောက်လိုက်တာနဲ့ ဗိုက်ထဲမှာ အရမ်းသက်သာတာကို ခံစားရတယ်။ ဆက်သောက်ရင်းနဲ့ ဗိုက်ချောင်လာပြီး အရင်လို ဗိုက်မအောင့်တော့ဘူး။ လေကောင်းကောင်းထွက်ပြီး အရေးအကြီးဆုံးကတော့ လက်ခြေတွေ အေးတာပါ ပျောက်သွားတယ်။
တချို့ရက်တွေဆို ဂျင်းပြုတ်ရည် မလုပ်ဖြစ်ရင် ဂျင်းအစိမ်းကို ဝါးစား ပါတယ်။
ဂျင်းအစိမ်းကို ပါးပါးလှီးပြီး တစ်နေ့ကို ၂-၃ ပြားလောက် အစိမ်းဝါးစားကြည့်တာ စပ်ဖျဉ်းဖျဉ်းနဲ့ တကယ်ပဲ ဗိုက်ချောင်ပြီး လေလည်တာ အရမ်းကောင်းပါတယ်။ အလွယ်ကူဆုံးနည်းလမ်းကို ကြိုက်သူတွေအတွက်ကတော့ အစိမ်းဝါးစားတာက အဆင်ပြေပါတယ်။
အခုဆိုရင်တော့ အကျင့်ဖြစ်နေပါပြီ။ တစ်ခါတလေ ဂျင်းပြုတ်ရည် သောက်တယ်၊ တစ်ခါတလေ အစိမ်းဝါးစားတယ်။ အထူးသဖြင့် အဆီများတဲ့ အစားအစာတွေ၊ ကြော်ထားတဲ့ အစားအစာတွေ စားတဲ့နေ့ ဒါမှမဟုတ် ဗိုက်အောင့်တယ်လို့ ခံစားရတဲ့နေ့ဆိုရင် သောက်လိုက်တာနဲ့၊ ဝါးလိုက်တာနဲ့ တကယ်ပဲ ဗိုက်သက်သာတာကို ချက်ချင်း သိသာပါတယ်။
ဒီလိုကောင်းမှန်းသာ သိခဲ့ရင် အရင်ကတည်းက စားခဲ့ပြီးပြီပေါ့လို့ တွေးမိပါတယ်ရှင်။
