အန္တရာယ်ရှိလုပ်ငန်းခွင်များတွင် လုပ်ကိုင်နေသည့် ကလေးလုပ်သား ၈၀ ကျော်ရှိ
---------------------------------------------------
ကလေးအလုပ်သမားစစ်တမ်း ၂၀၂၄- ၂၀၂၅ အစီရင်ခံစာအရ တိုင်းဒေသကြီးနဲ့ပြည်နယ် ၁၀ခုရှိ အန္တရာယ်ရှိတဲ့ လုပ်ငန်းခွင်တွေမှာ အလုပ်လုပ်ကိုင်နေတဲ့ ကလေးသူငယ် ၈၂ယောက် ရှိတယ်လို လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာသန်းစိုးက ပြောပါတယ်။
အောက်တိုဘာလ ၂၈ ရက်က လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှာ ကျင်းပတဲ့ မြန်မာနိုင်ငံကလေးအလုပ်သမား ပပျောက်ရေးဆိုင်ရာ အမျိုးသားကော်မတီရဲ့ အဆိုးရွားဆုံးပုံစံဖြင့် ခိုင်းစေခံရသော ကလေးအလုပ်သမားများ ဖယ်ရှားရေးနှင့် ပြန်လည်ကုစားရေး လုပ်ငန်းကော်မတီ လုပ်ငန်းညှိနှိင်းအစည်းအဝေးမှာ ဒုတိယဝန်ကြီးက အခုလိုထည့်သွင်းပြောကြားခဲ့တာပါ။
အဲဒီကလေးသူငယ်တွေကို လူမှုဖြစ်ရပ် စီမံခန့်ခွဲမှုနည်းလမ်းတွေနဲ့အညီ ကွင်းဆင်းဆောင်ရွက်ခဲ့ပြီး လိုအပ်တာတွေ ဆောင်ရွက်ပေးခဲ့သလို အရည်အသွေး ပြည့်ဝတဲ့ လုပ်သားကောင်းတွေ ရရှိစေဖိုအတွက် လူမှုဝန်ထမ်းဦးစီးဌာနအောက်ရှိ လူငယ်သင်တန်းကျောင်းတွေက ကျောင်းသား၊ကျောင်းသူတွေကိုလည်း အသက်မွေးပညာသင်တန်းတွေ ဖွင့်လှစ် သင်ကြားလေ့ကျင့်ပေးနေတယ်လို ဆိုပါတယ်။
အဆိုးရွားဆုံးပုံစံဖြင့် ခိုင်းစေခံရသော ကလေးအလုပ်သမားများ ဖယ်ရှားရေးနှင့် ပြန်လည်ကုစားရေး လုပ်ငန်းစီမံချက် ၂၀၂၄ - ၂၀၂၈ အရ ကျူးလွန်သူကို တရားစွဲဆိုတာ၊ကလေးသူငယ်ကို အကာအကွယ်ပေးတာနဲ့ လိုအပ်တဲ့ ထောက်ပံ့တာတွေကို ဆောင်ရွက်နေပါတယ်။
ဒါ့အပြင် မြန်မာနိုင်ငံ ကလေးအလုပ်သမား ပပျောက်ရေးဆိုင်ရာ ၅ နှစ်စီမံချက် ၂၀၂၄-၂၀၂၈ ခုနှစ်မှာပါရှိတဲ့ လုပ်ငန်းစဉ်တွေကိုလည်း သက်ဆိုင်ရာဌာနအဖွဲအစည်းတွေနဲ့ ဝိုင်းဝန်းပူးပေါင်း ကြိုးပမ်းဆောင်ရွက်သွားမှာ ဖြစ်တယ်လို ဒုတိယဝန်ကြီးက ပြောပါတယ်။
အဆိုးရွားဆုံးပုံစံနဲ့ ခိုင်းစေတဲ့ အလုပ်ရှင်တွေက်ိ ဥပဒေပိုင်းဆိုင်ရာ အသိပညာတွေပေးဖိုအတွက် ခိုင်းစေခံရတဲ့ ကလေးအလုပ်သမားတွေ တွေ့ရှိရင် လူမှုဝန်ထမ်းဦးစီးဌာနရဲ့ Hot Line နံပါတ် ၁၅၆၆ ကို သတင်းပေးပိုနိုင်တယ်လို သိရပါတယ်။
