◾️မြန်မာ့ငြိမ်းချမ်းရေးကြိုးပမ်းမှုများတွင်အာဆီယံကတဖြည်းဖြည်းတိုးတက်လာကြောင်းမလေးရှားဝန်ကြီးချုပ်ပြော
မြန်မာနိုင်ငံဆိုင်ရာ ဘုံသဘောတူညီချက် (၅)ရပ်(5PC)အကောင်အထည်ဖော်မှုတွင်အာဆီယံက တဖြည်းဖြည်း တိုးတက်မှုရှိလာကြောင်း မလေးရှားဝန်ကြီးချုပ် အန်ဝါ အီဘရာဟင်ကယမန်နေ့တွင် ပြောကြားသည်။
ဒေသတွင်းအုပ်စုသည် အဖွဲ့ဝင်နိုင်ငံအားလုံး စုပေါင်းသဘောတူထားသည့်5PC အောက်ရှိ ကျယ်ပြန့်သော ကန့်သတ်ချက်များအတွင်း ဆက်လက်ပါဝင်ဆောင်ရွက်သွားမည်ဟု ယခုနှစ်အတွက် အာဆီယံဥက္ကဋ္ဌအဖြစ် တာဝန်ယူထားသည့် ဝန်ကြီးချုပ်အန်ဝါက ပြောကြားသည်။
“ဟုတ်ပါတယ်၊ ပစ်ခတ်မှုတွေတော့ ရှိနေပါတယ်၊ ဒါပေမယ့် ပြီးခဲ့တဲ့ နှစ်အနည်းငယ်အတွင်း ဖြစ်ပွားခဲ့တာနဲ့ နှိုင်းယှဉ်ရင် အများကြီး သေးငယ်ပါတယ်။ ကျွန်တော်တို့မှာ မြန်မာနိုင်ငံ ဒါမှမဟုတ် အာဆီယံအတွင်းက ဒုက္ခသည် ၂၀၀,၀၀၀ ရှိပါတယ်၊ ဒါပေမယ့် ပြီးခဲ့တဲ့ တစ်နှစ်အတွင်းမှာတော့ ဒီလိုပြဿနာတွေနဲ့ ကြုံတွေ့ခဲ့ရတာ မရှိပါဘူး။” ဟု ယမန်နေ့တွင်ကျင်းပသည့် (၄၇) ကြိမ်မြောက် အာဆီယံထိပ်သီးအစည်းအဝေး၏ပြင်ပတွင်ပြုလုပ်သည့် Bloomberg စီးပွားရေးထိ ပ်သီး အ စည်းအဝေးအဖွင့်ညစာစားပွဲတွင် ၎င်းက ပြောကြားသည်။
အာဆီယံဘုံသဘောတူညီချက်အောက်တွင် သတ်မှတ်ထားသော စည်းကမ်းချက်များထဲမှ တစ်ခုမှာ နိုင်ငံရေး ကွဲပြားမှုများ၊ သို့မဟုတ် အုပ်စုများ မည်သို့ပင်ရှိစေကာမူ မြန်မာနိုင်ငံအနေဖြင့် လူသား ချင်း စာနာထောက်ထားမှု အကူအညီများအတွက် အပြည့်အဝ ဝင်ရောက်ခွင့်ပြုရမည် ဖြစ်သည်ဟု အန်ဝါက ပြောကြားသည်။
"လူ့အခွင့်အရေးအကြောင်း ပြောတဲ့အခါ ကျေနပ်စရာတော့ မဟုတ်ပါဘူး၊ ဒါပေမယ့် ကျွန်တော့်အတွက်တော့ တဖြည်းဖြည်းချင်း တိုးတက်မှုတစ်ခုလို့ မြင်ပါတယ်။ ကျွန်တော်တို့ ဆက်လက်ပါဝင်ဆောင်ရွက်မယ်ဆိုရင် ဖြေရှင်းဖို့ အထောက်အကူဖြစ်လိမ့်မယ်လို့ ကျွန်တော် ယုံကြည်ပါတယ်။" ဟု ၎င်းကဆိုသည်။
သတင်း-စံတော်ချိန်ဒစ်ဂျစ်တယ်
ကိုးကား- Bernama
#ပြည်တွင်းသတင်း
