◾️ရွေးကောက်ပွဲတွင် ကိုယ်စားလှယ်လောင်းနှစ်ဦးတည်း ယှဉ်ပြိုင်မည့်မဲဆန္ဒနယ် ၈၀ ကျော်ရှိ
လာမည့်အထွေထွေရွေးကောက်ပွဲတွင် ကိုယ်စားလှယ်လောင်းနှစ်ဦးတည်းသာယှဉ်ပြိုင်ကြရမည့် မဲဆန္ဒနယ်စုစုပေါင်း ၈၁ ခုရှိကြောင်း ပြည်ထောင်စုရွေးကောက်ပွဲကော်မရှင်ကထုတ်ပြန်ထားသည့် အချက်အလက်များအရသိရသည်။
ပြည်ထောင်စုရွေးကောက်ပွဲကော်မရှင်ကထုတ်ပြန်ထားသော အတည်ပြုကိုယ်စားလှယ်လောင်းစာရင်း များအရ လွှတ်တော်သုံးရပ်အတွက် နိုင်သူအကုန်ယူ(FPTP)စနစ်မဲဆန္ဒနယ်များတွင် ပြိုင်ဘက် ကိုယ်စားလှယ်လောင်းနှစ်ဦးတည်းသာယှဉ်ပြိုင်ရမည့် မဲဆန္ဒနယ် ၈၀ ကျော်ပါဝင်နေခြင်းဖြစ်သည်။
ပြည်သူ့လွှတ်တော်မဲဆန္ဒနယ် ၃၃ ခု၊ အမျိုးသားလွှတ်တော် မဲဆန္ဒနယ်ခြောက်ခု၊ တိုင်းရင်းသားရေးရာ ကိုယ်စားလှယ်နေရာအပါအဝင် တိုင်းနှင့်ပြည်နယ်လွှတ်တော် မဲဆန္ဒနယ် ၄၂ ခုတို့တွင် ပြိုင်ဘက်နှစ်ဦး တည်းသာရှိနေသည်။
အဆိုပါမဲဆန္ဒနယ်များအားလုံးတွင် ပြည်ခိုင်ဖြိုးပါတီဝင်ကိုယ်စားလှယ်လောင်းများက ပြိုင်ဘက်အဖြစ် ပါဝင်နေပြီး အခြားပါတီဝင်ကိုယ်စားလှယ်လောင်းများ၊ တစ်သီးပုဂ္ဂလများနှင့် ယှဉ်ပြိုင်ကြမည်ဖြစ်သည်။
ပြိုင်ဘက်နှစ်ဦးတည်းရှိသည့် မဲဆန္ဒနယ်များသည် ရှမ်းပြည်နယ်တွင် အများဆုံးရှိနေပြီး ကချင်၊ ကယား၊ ချင်း၊ ရခိုင် စသည့်ပြည်နယ်များနှင့် စစ်ကိုင်း၊ မကွေးနှင့် တနင်္သာရီတိုင်းတို့တွင်လည်း ပြိုင်ဘက်နှစ်ဦး တည်းယှဉ်ပြိုင်ရွေးချယ်ခံမည့် မဲဆန္ဒနယ်များပါဝင်သည်။
အထက်ပါမဲဆန္ဒနယ် ၈၀ ကျော်အနက် ၂၈ နေရာတွင် ပြည်ခိုင်ဖြိုးပါတီနှင့် ရှမ်းနှင့်တိုင်းရင်းသားများ ဒီမိုကရက်တစ်ပါတီတို့ထိပ်တိုက်ယှဉ်ပြိုင်ရမည်ဖြစ်ပြီး ဇိုမီး၊ ချင်း၊ ရခိုင်၊ နာဂ၊ ဓနု၊ ပအိုဝ်း၊ လီဆူ၊ တိုင်းလိုင် (ရှမ်းနီ)၊ “ဝ” စသည့် တိုင်းရင်းသားဒေသနှင့်လူမျိုးစုအခြေပြုပါတီများနှင့် ပြည်ခိုင်ဖြိုးပါတီတို့ ထိပ်တိုက်ယှဉ်ပြိုင်ရမည့် မဲဆန္ဒနယ်များလည်းပါဝင်သည်။
ထို့ပြင် တိုင်းနှင့်ပြည်နယ်အားလုံး၌ ပါဝင်ယှဉ်ပြိုင်သည့် ပါတီများဖြစ်သော ပြည်သူ့ရှေ့ဆောင်ပါတီ၊ တစည၊ ပြည်သူ့ပါတီတို့အပြင် ကိုယ်စားလှယ်လောင်းများနှင့် ပြည်ခိုင်ဖြိုးကိုယ်စားလှယ်လောင်းများ နှစ်ဦးတည်းယှဉ်ပြိုင်ကြမည့် မဲဆန္ဒနယ်အချို့၊ တစ်သီပုဂ္ဂလကိုယ်စားလှယ်လောင်းနှင့် ပြည်ခိုင်ဖြိုးကိုယ် စားလှယ်လောင်းတို့ယှဉ်ပြိုင်ရမည့် မဲဆန္ဒနယ်အချို့ကိုလည်းတွေ့ရသည်။
ကော်မရှင်ကအတည်ပြုထုတ်ပြန်ထားသော ကိုယ်စားလှယ်လောင်းစာရင်းများအရ ကိုယ်စားလှယ် လောင်းတစ်ဦးတည်းသာ အမည်စာရင်းတင်သွင်းထားသော မဲဆန္ဒနယ် ၃၁ ခုရှိပြီး ယင်းတို့အနက် ၂၈ ခု တွင်ပြည်ခိုင်ဖြိုးပါတီဝင်များသာရှိကာ ရှမ်းနှင့်တိုင်းရင်းသားများဒီမိုကရက်တစ်ပါတီ၊ အာခါအမျိုးသား ဖွံဖြိုးတိုးတက်ရေးပါတီ၊ “ဝ”အမျိုးသားပါတီ တို့လည်း တစ်နေရာစီပါဝင်သည်။
ရွေးကောက်ပွဲဆိုင်ရာဥပဒေများအရ အဆိုပါမဲဆန္ဒနယ်များတွင် ရွေးကောက်ပွဲကျင်းပရန်မလိုတော့ဘဲ လက်ရှိအမည်စာရင်းတင်သွင်းထားသည့် တစ်ဦးတည်းသော ကိုယ်စားလှယ်လောင်းများကိုသာ အနိုင်ရ အမတ်အဖြစ် သတ်မှတ်မည်ဖြစ်သည်။
ကိုယ်စားလှယ်လောင်းတစ်ဦးတည်းသာ ရှိနေသည့် မဲဆန္ဒနယ်များအနက်မှ အချို့သည် ပြည်သူ့ပါတီက ပါဝင်ယှဉ်ပြိုင်ရန် ကြိုးစားခဲ့သည့်နေရာများဖြစ်ပြီး ကိုယ်စားလှယ်လောင်းစာရင်းတင်သွင်းရန် သဘော တူထားသူများကပြန်ရုတ်သိမ်းသွားသဖြင့် အမည်စာရင်းမတင်နိုင်ခဲ့ကြောင်း ပြည်သူ့ပါတီဥက္ကဌ ဦးကိုကိုကြီးက ၎င်း၏လူမှုကွန်ရက်စာမျက်နှာတွင် ရေးသားထားသည်။
ကျန်ရှိနေသော နိုင်သူအကုန်ယူ (FPTP)စနစ် မဲဆန္ဒနယ်များတွင် ကိုယ်စားလှယ်လောင်း အနည်းဆုံး သုံးဦးမှ ၁၀ ဦးဝန်းကျင်အထိယှဉ်ပြိုင်ကြမည်ဖြစ်ပြီး အချိုးကျကိုယ်စားပြုစနစ် PR မဲဆန္ဒနယ်များ တွင်မူ ကိုယ်စားလှယ်လောင်း ၃၀ ဝန်းကျင်အထိ ဦးစားပေးအလိုက် အမည်စာရင်းများ ပေးသွင်းထား ကြသည်။
အထွေထွေရွေးကောက်ပွဲတွင် နိုင်ငံရေးပါတီ ၅၆ခုနှင့် တစ်သီး ပုဂ္ဂလတို့မှ ကိုယ်စားလှယ်လောင်း စုစုပေါင်း ၅၀၀၀ နီးပါး ယှဉ်ပြိုင်မည်ဖြစ်ပြီး လာမည့် ဒီဇင်ဘာ ၂၈ ရက်တွင်ကျင်းပမည့် ပထမဆုံး အသုတ် ရွေးကောက်ပွဲကို မြို့နယ်ပေါင်း ၁၀၀ ကျော်၌ ကျင်းပမည်ဟု ပြည်ထောင်စုရွေးကောက်ပွဲ ကော်မရှင်က ကြေညာထားသည်။
သတင်း/ဓာတ်ပုံ- စံတော်ချိန်ဒစ်ဂျစ်တယ်
#ပြည်တွင်းသတင်း