ပလေးအော့ဖ်ပွဲမကန်ခင် ရွှေဖိနပ်ဆု လက်ခံရယူခဲ့သည့် မက်ဆီ
----------------------
အင်တာမိုင်ယာမီအသင်း တိုက်စစ်မှူး လီယွန်နယ် မက်ဆီဟာ သောကြာညက ကစားခဲ့တဲ့ နက်ရှ်ဗီလီအသင်းနဲ့ ပလေးအော့ဖ်ပွဲမကန်ခင်မှာ ၂၀၂၅ မေဂျာလိဂ်ရာသီရဲ့ သွင်းဂိုးအများဆုံ ရွှေဖိနပ်ဆုကိုလက်ခံရယူခဲ့ပါတယ်။
မက်ဆီဟာ မေဂျာလိဂ် ၂၈ ပွဲမှာ ၂၉ ဂိုးသွင်းယူခဲ့ပြီး ရွှေဖိနပ်ဆုကို ရရှိတာဖြစ်သလို ၂၀၂၃ မှာ မေဂျာလိဂ်ကို ရောက်လာပြီးနောက်ပိုင်း မက်ဆီအတွက် ပထမဆုံးရွှေဖိနပ်ဆုလည်း ဖြစ်ပါတယ်။
မေဂျာလိဂ်ရဲ့ ကော်မရှင်နာ ဖြစ်တဲ့ ဒွန်ဂါဘာက မက်ဆီကို ရွှေဖိနပ်ဆုပေးအပ်ခဲ့တာဖြစ်ပြီး မက်ဆီက အင်တာမိုင်ယာမီအသင်းနဲ့ မေဂျာလိဂ် အတွက် အခုလောက်ထိ စွမ်းဆောင်ပေးနိုင်တယ်ဆိုတာ ယုံတောင်မယုံနိုင်ပါဘူးလို့ ဒွန်ဂါဘာက ပြောသွားခဲ့ ပါတယ်။
မက်ဆီဟာ ပြီးခဲ့တဲ့ရက်ပိုင်းကမှ အင်တာမိုင်ယာမီအသင်းနဲ့ ၂၀၂၈ အထိ သက်တမ်းရှိတဲ့ ၃ နှစ်စာချုပ်ကို ချုပ်ဆိုခဲ့တာဖြစ်ပြီး သူ့ရဲ့ ဆုတံဆိပ်ပြခန်းတွေထဲမှာ မေဂျာလိဂ် ရွှေဖိနပ်ဆုကို ထပ်ပြီးစုဆောင်းနိုင်တာလည်း ဖြစ်ပါတယ်။
မက်ဆီက မေဂျာလိဂ်ကို အောင်မြင်မှုပိုရအောင်လုပ်ပေးခဲ့သလို နောက်ထပ် ၃ နှစ်လောက် ထပ်ရှိ နေဦးမှာက မေဂျာလိဂ်အတွက် လက်ဆောင်တစ်ခုဖြစ်ပါတယ်လို့လည်း ဒွန်ဂါဘာက ပြောသွားပါတယ်။
၂၀၂၅ မေဂျာလိဂ်ပြိုင်ပွဲမှာ ဂိုးဖန်တီးမှု ၁၉ ကြိမ်နဲ့ အများဆုံးပြုလုပ်ပေးထားတဲ့ မက်ဆီဟာ မေဂျာလိဂ် MVP ဆုကို ၂ နှစ်ဆက်တိုက်ရယူနိုင်ဖို့ ရေပန်းစားနေတာဖြစ်ပါတယ်။
ရွှေဖိနပ်ဆုလက်ခံရယူပြီးနောက် ကစားခဲ့တဲ့ နက်ရှ်ဗီလီ အသင်းနဲ့ပွဲမှာလည်း မက်ဆီက သွင်းဂိုး ၂ ဂိုးသွင်းယူပေးခဲ့ပြီး ပွဲအပြီးမှာ အင်တာမိုင်ယာမီက ၃-၁ ဆိုတဲ့ရလဒ်နဲ့ အနိုင်ရကာ နောက်တစ်ဆင့်ကို တက်သွားခဲ့ပါတယ်။
