ပုဂံရှေးဟောင်းယဥ်ကျေးမှုနယ်မြေကို နိုဗိုစီဗစ်ဒေသဆိုင်ရာ စီးပွားရေးဖွံ့ဖြိုးတိုးတက်မှုဝန်ကြီးဌာန ဒု-ဝန်ကြီးနှင့်အဖွဲ့ကြည့်ရှုလေ့လာ
မြန်မာနိုင်ငံသို့ရောက်ရှိနေသည့် ရုရှားနိုင်ငံ၊ နိုဗိုစီဗစ်ဒေသဆိုင်ရာ စီးပွားရေးဖွံ့ဖြိုးတိုးတက်မှုဝန်ကြီးဌာန ဒု- ဝန်ကြီး မစ္စအန်နာဆာဂျီယဲဗ်နာ့ဗင်နီကော့ဗာနှင့်အဖွဲ့သည် အောက်တိုဘာ ၂၃ ရက်က မန္တလေးတိုင်း၊ ညောင်ဦးမြို့နယ်ရှိ ပုဂံရှေးဟောင်းယဉ်ကျေးမှုနယ်မြေအား ကြည့်ရှုလေ့လာခဲ့ကြသည်။
ပုဂံမြို့ဟောင်းရှိ ရှေးဟောင်းသုတေသနနှင့်အမျိုးသားပြတိုက်၊ အာနန္ဒာဘုရားကြီး၏ အနုလက်ရာများ၊ မြင်းကပါကျေးရွာရှိ မြစေတီဘုရား၊ ရွှေစည်းခုံစေတီတော်ကြီး၊ ရာဇကုမာရ်ကျောက်စာ၊ မြင်းကပါဂူပြောက်ကြီးဘုရားအတွင်းရှိ နံရံဆေးရေးပန်းချီများနှင့် နန်းမြင့်မျှော်စင်တို့ကို ကြည့်ရှုလေ့လာခဲ့ကြသည်။
ထို့ပြင် ပုဂံမြို့သစ်ရှိ ဦးဘငြိမ်းယွန်းထည်လုပ်ငန်းနှင့် ယွန်းအရောင်းဆိုင်ရှိ မြန်မာ့ရိုးရာ ယွန်းလက်မှုပစ္စည်းများ၊ ထီးလိုမင်းလိုဘုရား၌ ပုဂံဒေသနေဝင်ဆည်းဆာအလှတို့ကိုလည်း ကြည့်ရှုခဲ့ကြသည်။
