လျှပ်စစ်မီတာသုံးစွဲခများ လအလိုက် မပေးဆောင်ပါက ချက်ချင်းမီးဖြတ်တောက်မှု စတင်ပြုလုပ်နေဟု ဆို
လျှပ်စစ်မီတာသုံးစွဲခများ လအလိုက် မပေးဆောင်ပါက ချက်ချင်းမီးဖြတ်တောက်မှု စတင်ပြုလုပ်နေသည်ဟု မီတာခ မဆောင်မိသဖြင့် မီးဖြတ်တောက်ခံရသော ပြည်သူများက ပြောသည်။
နွေဦးတော်လှန်ရေးကြောင့် မီတာခများ မပေးဆောင်ခြင်း၊ နယ်မြေစိုးမိုးမှု ယာယီလွတ်ကင်းနေသော ဒေသများရှိနေခြင်းနှင့် ယခင်က လျှပ်စစ်မီတာခများအား သုံးလ၊ လေးလမှ လများသွာကြာအောင် မီတာခမဆောင်ကြသော်လည်း လျှပ်စစ်မီးဖြတ်တောက်မှု မရှိခဲ့ဘဲ ယခုလမှ စတင်ကာ ရက်လွန်သည်နှင့် မီးဖြတ်တောက်နေသည်ဟုလည်း ပြောသည်။
“ဒီလ မီတာခဆောင်ဖို့မေ့သွားတာ။ ခါတိုင်းလည်း သုံးလေးလမဆောင်ဖြစ်တာကို မီးမဖြတ်ဘဲ ဒီမနက်ကြမှ တစ်အိမ်တည်း မီးဖြတ်သွားလို့ EPC ရုံး ဖုန်းဆက်မှ ရက်လွန်လို့ မီးဖြတ်တာ၊ အရင်လို မရတော့ဘူးပြောတယ်။ သူတို့ပြောတာကတော့ မီတာခလာဆောင်၊ အရေးပေါ်မီးပျက်မှာ စာရင်းသွင်းပြီးမှ မီးလာအောင် ပြန်လာလုပ်ပေးမယ်ပြောတယ်... ဟု ယနေ့ မီးဖြတ်ခံရသည့် ပြည်သူတစ်ဦးက ပြောသည်။
လျှပ်စစ်မီတာခများအချိန်မီမပေးဆောင်ပါက ယခုလတင်သာမက နောက်လာမည့်လများတွင်ပါ တစ်ရက်လွန်သည်နှင့် ဖြတ်တောက်မည်ဖြစ်၍ မီတာခပုံမှန်မပေးဆောင်ပါက လစဉ်မီးဖြတ်ခံနေရမည်ဟုလည်း တာမွေမြို့နယ်လျှပ်စစ်ရုံး အရေးပေါ်မီးပျက်ပြုပြင်ဌာန တာဝန်ရှိသူတစ်ဦးက ပြောသည်။
