ခြေစစ်ပွဲမအောင်ရင် အီတလီနိုင်ငံက ထွက်ခွာမယ်လို့ ဂတ်တူဆို ပြော
၂၀၂၅ ခုနှစ်၊ အောက်တိုဘာ ၁၇
အီတလီအသင်းနည်းပြ ဂတ်တူဆိုက ၂၀၂၆ ကမ္ဘာ့ဖလားပြိုင်ပွဲမှာ အီတလီအသင်း ခြေစစ်ပွဲ မအောင်မြင်ရင် နိုင်ငံကနေ ထွက်ခွာပြီး အခြားနိုင်ငံမှာ သွားရောက် နေထိုင်မယ်လို့ ပြောခဲ့ပါတယ်။
ဂတ်တူဆိုက “ရည်မှန်းထားတဲ့ ပန်းတိုင်ရောက်အောင် လုပ်နိုင်ရင် ကျနော် ဂုဏ်ပြုခံရမှာပါ၊ ဒီလိုမှ မဟုတ်ရင် တော့ ကျနော်ဟာ အီတလီနိုင်ငံနဲ့ ဝေးရာကို ထွက်ခွာသွားမှာပါ။ စပိန်နိုင်ငံ မာဘယ်လာမှာ နေထိုင်ဖို့ ရှိနိုင်ပေမယ့် ဒီထက်ဝေးရာကိုလည်း သွားနိုင်ပါတယ်။ ဒီအကျိုးဆက်ကို ကျနော်သိပါတယ်”လို့ ပြောခဲ့တာပါ။
၂၀၀၆ ကမ္ဘာ့ဖလားပြိုင်ပွဲမှာ အီတလီအသင်းနဲ့ ချန်ပီယံဆု ရယူနိုင်ခဲ့တဲ့ ဂတ်တူဆိုဟာ ဇွန်လမှာ အီတလီ လက်ရွေးစင်အသင်းကို နည်းပြသစ်အဖြစ် စတင်ကိုင်တွယ်ခဲ့တာ ဖြစ်ပါတယ်။
ဂတ်တူဆိုရဲ့ လက်ထက်မှာ အီတလီအသင်းဟာ ၄ ပွဲဆက်တိုက် နိုင်ပွဲရခဲ့ပြီး အနိမ့်ဆုံး ၂၀၂၆ ကမ္ဘာ့ဖလားပြိုင်ပွဲ အတွက် ပလေးအော့ဖ် ယှဉ်ပြိုင်ခွင့်ရဖို့ သေချာခဲ့ပါတယ်။
အီတလီအသင်းဟာ ၂၀၂၆ ကမ္ဘာ့ဖလား ခြေစစ်ပွဲ အုပ်စုမှာ ထိပ်ဆုံးနေရာ ရပ်တည်နေတဲ့ နော်ဝေအသင်းနဲ့ ၃ မှတ် အကွာ အဆင့် ၂ နေရာမှာ ရပ်တည်နေတာ ဖြစ်ပါတယ်။
အီတလီအသင်းဟာ ပြီးခဲ့တဲ့ ၂၀၁၈ နဲ့ ၂၀၂၂ ကမ္ဘာ့ဖလားပြိုင်ပွဲတွေမှာ ခြေစစ်ပွဲ မအောင်မြင်ခဲ့တာကြောင့် ၂၀၂၆ ကမ္ဘာ့ဖလားပြိုင်ပွဲမှာ ခြေစစ်ပွဲ ထပ်ပြီး မအောင်မြင်မှာကို စိုးရိမ်မှုတွေ ရှိနေကြတာပါ။
အီတလီအသင်းကို ကိုင်တွယ်ရတာ ဖိအားဒဏ်တွေ ခံစားရပေမယ့် ဂတ်တူဆိုကတော့ နိုင်ငံအသင်းကို နည်းပြ ရတဲ့အပေါ် ဂုဏ်ယူမိတယ်လို့ ပြောခဲ့ပါတယ်။
အီတလီအသင်းဟာ နည်းပြ ဂတ်တူဆိုရဲ့ လက်ထက် ကစားထားတဲ့ ၄ ပွဲမှာ ၁၆ ဂိုးသွင်းပြီး ပေးဂိုး ၅ ဂိုး ခွင့်ပြု ထားရတာပါ။
အီတလီအသင်းဟာ လာမယ့် နိုဝင်ဘာမှာ ၂၀၂၆ ကမ္ဘာ့ဖလား ခြေစစ်ပွဲ အုပ်စု နောက်ဆုံးပွဲစဉ်တွေအဖြစ် မောလ်ဒိုဗာ၊ နော်ဝေအသင်းတို့နဲ့ ယှဉ်ပြိုင်ရမှာဖြစ်ပါတယ်။
