ဧရာဝတီတိုင်းမှာ ဆားကွင်းတွေပျက်မှ ဆားဈေးတက်လို့ ငန်းရှင်တွေ အကျိုးမမြတ်မရှိဖြစ်

အောက်တိုဘာ ၁၇

ဆားထွက်ရှိတဲ့ ဧရာဝတီတိုင်းမှာ နေလှန်းဆားကြမ်း ၁ ပိသာကျပ် ၁၀၀၀ ကျော်အထိဈေးထိုးတက်ပေမယ့်ဆား လုပ်ငန်းရှင်တွေအဖို့ အကျိုးမရှိဖြစ်နေတယ်လို့နေလှန်း ဆားလုပ်ငန်းရှင်တွေဆီကနေ သိရပါတယ်။

''အခုဆားဈေးက ရေကြီးရေလျှံမှုဒဏ်နဲ့မိုးဒဏ်ကြောင့် ဆားကွင်းတွေပျက်ပြီးဈေးက တက်လာတာ။ရေမြုပ်ပြီး ပျက်စီးတာတွေဖြစ်တော့ ဈေးကထိုးတက်နေတာ။အခုနှစ်ထဲမှာအမြင့် ဆုံးဈေးပဲ။အခုဆားကြမ်းတပိသာ ၁၂၀၀ ဈေးနဲ့တောင်အရင်လိုဆားကောင်းကောင်းမရဘူး။နီညိုရောင်ဖောက်ဆားတွေပဲရတယ်။ရေထိထားတဲ့ ဆားတွေကိုလေ။''လို့ ဧရာဝတီတိုင်းက နေလှန်းဆား လုပ်ငန်းရှင် တယောက်ပြောပါတယ်။

ဧရာဝတီတိုင်းမှာ ဒီနှစ်ဆားထုတ်လုပ်တဲ့ရာသီအစမှာပင် ရာသီတုဖောက် ပြန်ပြီး ဆားကွင်းတွေ အချိန်အခါမဟုတ် ဖျက်မိုးမိတာ။မိုးဒဏ်ကြောင့် ဆားကိုအပြည့်အဝကျုံးမယူ နိုင်ခဲ့တာ၊ ဆားချက်ရာမှာ အသုံးပြုတဲ့ စက်သုံးဆီဈေးနှုန်း အဆမတန် မြင့်တက်နေတာ၊ လုပ်သားခဈေးတက်လာ တာ၊ လုပ်သားရှားပါးလာတာ၊ ဆားဝယ်လက် တွေလျော့ သွားတာ၊ ဆားကွင်းတွေမှာလူစုလူဝေးမလုပ်ရဲတာစတဲ့ အကြောင်းအရင်းတွေနဲ့ အထွေထွေကုန်ကျစရိတ် ကြီးမြင့်မှုဒဏ်ကိုရင်ဆိုင်နေရတာကြောင့် အခက် အခဲဖြစ်ပေါ်နေ တယ်လို့ သိရပါတယ်။

''ဆားမရှိမှ ဆားဈေးကထိုးတက်လာ ဘာအကျိုးမှမရှိဘူး ဖြစ်တာပေါ့။ကုန်ပစ္စည်းမရှိမှ ဈေးတက်နေတာလေ။အခုနှစ်ဆားတွေစတင်လုပ်ကတည်းကတကြိမ်းပဲ ကျုံးရ တယ်။ အကုန်ပျက်ကုန်တာ။ အရင်းတောင်ပြန်မရလိုက်ဖူး။ကိုယ့်ကုန်ပစ္စည်းမရှိမှာဈေးတက်တာ ဘာလုပ်ရမှာ လည်း ။''လို့ နောက်ထပ်ဆားလုပ်ငန်းရှင်တယောက် ကပြောပါတယ်။

ဧရာဝတီတိုင်းမှာ နေလှန်ဆား ထုတ်လုပ်တဲ့ လုပ်ငန်းကို နှစ်စဉ် အောက်တိုဘာလမှာ စတင်လုပ်ကိုင်ကြ တာဖြစ် ပေမယ့် ဒီနှစ်မှာတော့မနှစ်ကအရှုံးပေါ်ခဲ့တာနဲ့အထွေထွေ အကျပ်အတည်အခက်အခဲတွေကြောင့်လက်ရှိအချိန် အထိ မလုပ်နိုင်ပဲ အခက်အခဲဖြစ်နေတယ်လို့ဆိုပါတယ်။

ဧရာဝတီတိုင်းမှာ ငပုတောမြို့နယ်က ကျေးရွာ ၃၀ ကျော် နဲ့ လပွတ္တာမြို့နယ်ကကျေးရွာ ၂၀ လောက် ဆားလုပ်ငန်း ကို အဓိကလုပ်ကိုင်ကြတာဖြစ်တယ်လို့သိရပြီး နေလှန်း ဆားလုပ်ငန်းဟာ မိရိုဖလာအလုပ်တခုဖြစ်တာကြောင့် အရှုံးခံပြီး လုပ်ကိုင်နေခဲ့ပေမယ့် ဒီနှစ်မှာတော့ထပ်ပြီး အရှုံးမခံနိုင်တော့လို့ ဆားလုပ်ငန်းချိန်ဆလုပ်ကိုင်တော့ မယ်လို့ ဆားလုပ်ငန်းရှင်တွေကဆိုပါတယ်။

ဆားကို အဓိကဝယ်ယူအသုံးပြုတဲ့ ငါးပိ ၊ ငါးခြောက် ၊ ငံပြာရည် လုပ်ငန်းတွေဘက်ကလည်း သူတို့လုပ်ငန်း တွေမှာ ကိုဗစ်-၁၉ ရောဂါနဲ့ နိုင်ငံရေး အပြောင်းအလဲ ဖြစ်စဉ်တွေကြောင့် ထိခိုက်ခဲ့လို့ လုပ်ငန်းတွေရာနှုန်း ပြည့်မလည်ပတ်နိုင်တာကြောင့် အရင်ကလောက် အသုံးမပြုတော့ ဘူးလို့ သိရပါတယ်။