မြန်မာနိုင်ငံရှိ အထူးကုဆရာဝန်များအား ရုရှားနိုင်ငံသို့ ပညာသင်စေလွှတ်ရေးနှင့်ကျန်းမာရေးဆိုင်ရာပူးပေါင်းဆောင်ရွက်ရေး နှစ်နိုင်ငံတာဝန်ရှိသူများဆွေးနွေး

ရန်ကုန် အောက်တိုဘာ ၁၅

မြန်မာနိုင်ငံရှိ အထူးကုဆရာဝန်များအား ရုရှားနိုင်ငံသို့ ပညာသင်စေလွှတ်ရေးနှင့်ကျန်းမာရေးဆိုင်ရာပူးပေါင်းဆောင်ရွက်ရေး ရုရှား-မြန်မာ နှစ်နိုင်ငံတာဝန်ရှိသူများဆွေးနွေးခဲ့ကြောင်းသိရသည်။

ကျန်းမာရေး ဝန်ကြီးဌာန ပြည်ထောင်စုဝန်ကြီး ဒေါက်တာ သက်ခိုင်ဝင်းသည် ရုရှားဖက်ဒရေးရှင်းနိုင်ငံ၊ စိန့်ပီတာစဘတ်မြို့ အစိုးရအဖွဲ့ဝင်၊ ပြည်ပဆက်ဆံ ရေးကော်မတီဥက္ကဋ္ဌ Mr. Evgeny Grigoryev နှင့် ကိုယ်စားလှယ်အဖွဲ့ အား အောက်တိုဘာလ ၁၄ရက်က ကျန်းမာရေးဝန်ကြီးဌာန အစည်းအဝေးခန်းမ၌ လက်ခံတွေ့ဆုံပြီး ကျန်းမာရေး​ဆိုင်ရာကိစ္စရပ်များဆွေးနွေးခဲ့ကြ​ကြောင်းသိရသည်။

တွေ့ဆုံစဉ် ရုရှားနိုင်ငံနှင့် မြန်မာနိုင်ငံအကြားကျန်းမာရေး ကဏ္ဍပူးပေါင်း ဆောင်ရွက်မှု မြှင့်တင်နိုင်ရေးကိစ္စရပ်များ၊ ကျန်းမာရေးဝန်ကြီးဌာနနှင့် စိန့်ပီတာစဘတ်မြို့ရှိ Napalkov Cancer Center တို့အကြား ၂၀၂၄ ခုနှစ်တွင် နားလည်မှုစာချွန်လွှာလက်မှတ်ရေးထိုးခဲ့ပြီး ကင်ဆာရောဂါကုသမှုဆိုင်ရာ အတွေ့အကြုံများဖလှယ်၍ ပူးပေါင်းဆောင်ရွက်လျက်ရှိသည့် ကိစ္စရပ်များ၊ စိန့်ပီတာစဘတ်မြို့ရှိ ဆေးဝါးစက်ရုံများမှ ထုတ်လုပ်သည့် ကင်ဆာရောဂါနှင့် ဆီးချိုရောဂါ ကုသမှုဆိုင်ရာ ဆေးဝါးနှင့် ဆေးပစ္စည်းများ မြန်မာနိုင်ငံသို့တင်သွင်း ရောင်းချလျက်ရှိသည့် ကိစ္စရပ်များ​ဆွေးနွေးခဲ့ကြောင်းသိရသည်။

ထို့အပြင် မြန်မာနိုင်ငံရှိ အထူးကုဆရာဝန်များအား ရုရှားနိုင်ငံသို့ ပညာသင်စေလွှတ်ရေးနှင့် နှစ်နိုင်ငံဆေးဘက်ဆိုင်ရာ တက္ကသိုလ်များအကြား ကျန်းမာရေး လူ့စွမ်းအားအရင်းအမြစ်ဖွံ့ဖြိုး တိုးတက်ရေး ပူးပေါင်းဆောင်ရွက် နိုင်မည့်ကိစ္စရပ်များ၊ ကလေး ဦးနှောက်နှင့်အာရုံကြော ရောဂါ ကုသမှုနှင့် ကလေးများတွင် ဖြစ်ပွားတတ်သော ကူးစက် ရောဂါကုသမှုဆိုင်ရာ ကိစ္စရပ်များ နှင့် ပတ်သတ်၍ ဖြည့်စွက်ဆွေးနွေးခဲ့ကြောင်းသိရသည်။

Credit - Trend News Journal

#centralnewsnaypyitaw