ပြည်တွင်းရွှေဈေး ရုတ်တရက်ခုန်တက်ပြီး ကျပ် ၈၅ သိန်းကျော် ရောက်ရှိ

အောက်တိုဘာ ၁၄

ကမ္ဘာ့ရွှေဈေး ထပ်မံ စံချိန်ချိုး မြင့်တက်လာမှုနဲ့အတူ လက်ရှိမှာ ပြည်တွင်းရှိ ပြင်ပ ရွှေဈေးဟာလည်း တရက်အတွင်း ကျပ် သုံးသိန်းဝန်းကျင် ခုန်တက်လာပြီး ကျပ် ၈၅ သိန်းကျော်ကို ရောက်ရှိလာတယ်လို့ ဈေးကွက်အတွင်းက စုံစမ်း သိရှိရပါတယ်။

လက်ရှိမှာ ကမ္ဘာ့ရွှေဈေးဟာ တအောင်စ ဒေါ်လာ ၄၁၅၈ ဝန်းကျင်ကို ရောက်ရှိနေတာဖြစ်ပြီး ပြီးခဲ့တဲ့ အောက်တိုဘာ ၈ ရက်နေ့ကထက် တအောင်စ ၁၀၉ ဒေါ်လာဝန်းကျင် ထပ်မံ မြင့်တက်လာတာ ဖြစ်ပါတယ်။

ဒါနဲ့ပတ်သက်လို့ ရွှေလုပ်ငန်းရှင် တယောက်က “ပြည်တွင်း ရွှေဈေးတက်တာက အဓိက ကတော့ ကမ္ဘာ့ရွှေဈေးတွေ တော်တော် တက်သွားတယ်ပေါ့။ မမျှော်မှန်း၊ မခန့်မှန်းနိုင်လောက်အောင် တက်သွားတယ်။ ၄၁၀၀ ကျော်သွားတယ်။ တခါမှမဖြစ်ဖူးတဲ့ ဈေးတွေပေါ့။ ပြည်တွင်းမှာ ဒေါ်လာဈေးကလည်း နည်းနည်းငြိမ်တယ်။ ထပ်မကျဘူးပေါ့။ အဲဒီတော့ ကမ္ဘာ့ဈေး တက်တာနဲ့အညီ ဒီမှာလည်း ၈၅ သိန်းကျော်သွားတယ်။ ဒီနေ့တောင် ၈၆ သိန်းဖြစ်မလား မပြောတတ်ဘူး” လို့ ပြောပါတယ်။

လက်ရှိမှာ ပြည်တွင်းရွှေဈေးဟာ ကျပ် ရှစ်ဆယ့်ငါးသိန်း နှစ်သောင်းဝန်းကျင်ကို ရောက်ရှိနေတာဖြစ်ပြီး အမေရိကန် ဒေါ်လာကတော့ တဒေါ်လာ ရောင်းဈေး ၄၀၇၀ ဝန်းကျင်မှာ ရောက်ရှိနေတာ ဖြစ်ပါတယ်။

“လတ်တလောမှာ ရွှေဈေးတွေ ထပ်တက်နိုင်ခြေ ရှိ၊ မရှိက မှန်းရတော့ တော်တော်ခက်တယ်။ ကမ္ဘာ့ဈေးကလည်း ဟိုတလောလေးတုန်းကတော့ ၄၀၀၀ ကျော်တယ်။ ကျော်ပြီးမှ တော်တော်လေးကို ပြန်ကျသွားသေးတယ်။ ၁၀၀ ကျော် ပြန်ကျသွားတယ်။ ကျပြီးတော့မှ အခု ၂၀၀ ကျော် ပြန်တက်တယ်။ အဲဒီတော့ ၁၀၀ ကျော် ကျလိုက်၊ ၂၀၀ ကျော် ပြန်တက်လိုက်နဲ့ အရမ်းကစားနေတော့ အခုလည်း ပြောလို့တော့မရဘူး။ ဆက်တက်မလား၊ ပြန်ပြီးတော့ ထိုးကျမလားဆိုတာ ဒေါ်နယ်လ်ထရမ့်တို့၊ တရုတ်တို့ အခြေအနေတွေပေါ် မူတည်တယ်။ သူတို့ ညှိလို့ ရ၊ မရပေါ့။ အခြေအနေတွေ တင်းမာနေတယ်လို့တော့ ပြောတာပဲ။ ကုန်သွယ်ရေး စစ်ပွဲပေါ့” လို့ နောက်ထပ် ရွှေလုပ်ငန်း တယောက်က ပြောပါတယ်။

လက်ရှိ ရွှေဈေးကွက် အတွင်းမှာတော့ အရောင်းအဝယ် အခြေအနေတွေက အရမ်းကို နည်းပါးနေပြီး ရွှေဈေး မြင့်တက်လေလေ လက်လီ ဝယ်နိုင်တဲ့သူတွေ နည်းပါးလေ ဖြစ်နေတယ်လို့ သူက ပြောပါတယ်။

ဒါအပြင် အတုံးအရောင်းအဝယ် လောကမှာလည်း တရားဝင် ရောင်းချနေကြတဲ့ အကယ်ဒမီနဲ့ အောင်သမာဓိ ရွှေဆိုင်နှစ်ဆိုင်သာ ရှိပြီး လတ်တလောမှာတော့ အဲဒီရွှေဆိုင်တွေမှာ ရွှေအတုံး လာရောင်းကြသူ၊ လာဝယ်ကြသူတွေ ရှိကာ အရောင်းအဝယ် ဖြစ်နေတယ်လို့ သူက ပြောပါတယ်။

ဒါအပြင် လက်ရှိ မှောင်ခိုဈေးကွက် အခြေအနေနဲ့ ပတ်သက်လို့လည်း သူက “မှောင်ခိုဈေးကွက်ကတော့ အရောင်းအဝယ် ဖြစ်တော့ဖြစ်တာပဲ။ ဒါပေမယ့် နည်းနည်းပါးပါးပေါ့နော်။ သိပ်အများကြီးတော့ မဖြစ်ဘူး။ ပြီးတော့ မှောင်ခိုကလည်း ဈေးတက်လေ၊ ဖမ်းမှာကြောက်လေ ဆိုတော့ ပိုပြီးတော့ သတိထားပြီး လုပ်ကိုင်နေကြတာပေါ့” လို့ သူက ပြောပါတယ်။

အခုလို ရွှေဈေးနှုန်းတွေ မြင့်တက်နေတာဟာ ရွှေလောကအတွက် ကောင်းမွန်တဲ့ အလားအလာ မဟုတ်ဘဲ ကမ္ဘာ့ဈေးပြန်ကျကာ ဒေါ်လာဈေးတွေလည်း ဆက်မတက်ဘဲ ငြိမ်နေမယ်ဆိုရင်တော့ အကောင်းဆုံးဖြစ်ပြီး အဲဒီလို ဖြစ်၊ မဖြစ်ကတော့ ကမ္ဘာ့ဈေးပေါ်မှာသာ မူတည်နေတယ်လို့ သူက ပြောပါတယ်။

ဒါအပြင် လက်ရှိမှာ ပြည်တွင်းရွှေဈေး သိန်း ၁၀၀ ဝန်းကျင်အထိ ရောက်ရှိသွားနိုင်တယ်လို့ ဈေးကွက်အတွင်း ဝေဖန်ပြောဆိုမှုတွေလည်း ရှိနေတာပါ။

ဒါနဲ့ ပတ်သက်လို့လည်း သူက “အဲဒီလောက်ကြီးကတော့ မဖြစ်နိုင်ဘူး ထင်တာပဲ။ ဒါပေမယ့် ပြောလို့တော့ မရဘူး။ ကမ္ဘာ့ဈေးပေါ်မှာပဲ မူတည်တယ်။ အရင်တုန်းကလည်း အဲဒီလိုပဲ ဖြစ်ခဲ့ဖူးတယ်။ သိန်း ၈၀ ၊ ၉၀ လောက်အထိ ဖြစ်ပြီးတော့ ၆၀ လောက်အထိကို ပြန်ကျသွားဖူးသေးတယ်။ အရင် ပြီးခဲ့တဲ့ တနှစ်၊ နှစ်နှစ်လောက်ကလေ။ အဲဒီတုန်းကလည်း လူတွေက ပြောကြတာပဲ။ တက်ပြီဟေ့ ဆိုတာနဲ့ လူတွေက ၁၀၀ အထိရောက်မယ်ဆိုပြီး လျှောက်ပြောကြတာပဲ။ အခုလည်း ပြောနေကြပေမယ့် ဖြစ်နိုင်ဖို့ကတော့ ၅၀ ရာခိုင်နှုန်းစီပါပဲ” လို့ သူက ပြောပါတယ်။

ရွှေဈေးကွက် ကျွမ်းကျင်သူတွေကတော့ လက်ရှိမှာ ကမ္ဘာ့ရွှေဈေးဟာ ဒီနှုန်းထားအတိုင်း ဆက်တက်သွားမယ် ဆိုပါက အခု ၂၀၂၅ ခုနှစ် မကုန်ခင်မှာတင် တအောင်စ ဒေါ်လာ ၅၀၀၀ ဈေးတန်းကို ရောက်ရှိသွားနိုင်တယ်လို့ ခန့်မှန်း ပြောဆိုနေကြပါတယ်။

လက်ရှိ ကမ္ဘာ့ရွှေဈေး မြင့်တက်နေတာဟာ အမေရိကန်ရဲ့ Global Power ကျဆင်းသွားတာကြောင့် ဖြစ်ပြီး စစ်ပွဲတွေကြောင့် ကမ္ဘာ့ကုန်သွယ်မှု ပြဿနာ ဖြစ်ပေါ်လာတာ ဖြစ်တဲ့အတွက် စစ်‌ပွဲတွေ ရပ်နိုင်မှသာ ဒေါ်လာဈေး ပြန်မာလာပြီး ရွှေဈေး ကျနိုင်မယ်လို့ ဈေးကွက် ကျွမ်းကျင်သူတယောက်က သုံးသပ် ပြောဆိုပါတယ်။

Photo - CJ

Credit - Voice of Myanmar

#သတင်းဟင်းလေးအိုးကြီး