ပျားရည် သောက်သင့်သူများနဲ့ မသောက်သင့်သူများ🐝🐝🐝
သမိုင်းကို လေ့လာကြည့်တဲ့အခါ ရှေးနှစ် ၁၀,၀၀၀ ခန့်ကတည်းက လူသားတွေ ပျားရည်ကို စားသုံးခဲ့ကြကြောင်း စပိန်နိုင်ငံက ကျောက်ဂူနံရံပန်းချီတွေအရ သိရပါတယ်။ ပျားရည်ဟာ ကမ္ဘာမြေပေါ်က ကျန်းမာရေးနဲ့ အညီညွတ်ဆုံး အစားအစာတွေထဲမှာ ပါဝင်ပါတယ်။
သောက်သုံးနည်းနှင့် ပျားရည်အဟောင်း/အသစ်
အရွယ်ရောက်သူတစ်ဦးအတွက် ပျားရည်ကို တစ်နေ့လျှင် လက်ဖက်ရည်ဇွန်း နှစ်ဇွန်းထက် ပို၍ မသောက်သင့်ပါ။ မနက်စောစော ဗိုက်ဗလာချိန် သို့မဟုတ် ညနေခင်း (ညစာမစားမီ နှစ်နာရီခန့်အလို) မှာ သောက်သုံးဖို့ အသင့်တော်ဆုံး ဖြစ်ပါတယ်။
ပျားရည်အသစ် (တစ်နှစ်အတွင်း) သည် လူကို ဝဖြိုးစေပြီး အသံကြည်လင် ကောင်းမွန်စေပါတယ်။
ပျားရည်အဟောင်း (တစ်နှစ်ကျော်) သည် လူကို အဆီကျ အသားကျစ်လစ် ပိန်စေပြီး၊ သွေးတိုး၊ လေငန်းသမားများအတွက် ဆေးကောင်းတစ်လက် ဖြစ်ပါတယ်။ သို့သော် များများစားပါက ဝမ်းချုပ်စေနိုင်ပါတယ်။
ရေနွေးဖြူ၊ သံပုရာရည်တို့နှင့် တွဲသောက်ခြင်း
ပျားရည်ကို ရေနွေးဖြင့် သောက်ခြင်းက မှိုသတ်ဆေး၊ ပိုးသတ်ဆေး၊ ဘက်တီးရီးယားသတ်ဆေးရည်အဖြစ် အစွမ်းထက်ပါတယ်။ ညဘက် ဆီးခဏခဏသွားတတ်သူများ ညနေခင်းပိုင်း သောက်ပေးခြင်းဖြင့် ကျောက်ကပ်ကို ကောင်းကျိုးပြုပြီး ညဘက် ဆီးထသွားခြင်းကို ထိန်းချုပ်ပေးနိုင်ပါတယ်။ လေလုံး၊ လေဖြင်းရှိသူများအတွက် ဆေးဖက်ဝင်ပြီး၊ သောက်စမှာ ဝမ်းဗိုက်ဖောင်းနိုင်ပေမဲ့ ဆက်လက်သောက်ပါက ဝမ်းနှင့် လေအဖြစ်ဆင်းသက်ကာ ပေါ့ပါးလန်းဆန်းစေပါတယ်။
ရေနွေးဖြူတစ်ခွက်ထဲသို့ ပျားရည်နှင့် သံပုရာရည် လက်ဖက်ရည်ဇွန်း တစ်ဇွန်းကျစီ ရော၍ မနက်အိပ်ယာထ ဗိုက်ဗလာချိန် ချက်ချင်းသောက်ပေးပါက အစာကျေညက်စေခြင်း၊ ကိုယ်ခံစွမ်းအား မြှင့်တင်ခြင်း၊ အဆုတ်မှ အချွဲအကျိများကို သန့်စင်ပေးခြင်း၊ ဝမ်းလွယ်စေခြင်း၊ ကိုယ်အလေးချိန် ကျစေခြင်း နှင့် အသားအရေ ဝင်းပကြည်လင်ခြင်း စသည့် ကျန်းမာရေးအကျိုးကျေးဇူးများစွာကို ခံစားရရှိနိုင်မှာ ဖြစ်ပါတယ်။
ပျားရည်သောက်သုံးရန် သင့်တော်သူများ
ပျားရည်သောက်သုံးရန် သင့်တော်သူများမှာ မီးဖွားပြီးခါစနှင့် နို့ချိုတိုက်ချိန် အမျိုးသမီးများ၊ ဓမ္မတာရာသီလာချိန် အမျိုးသမီးများ တို့ ပါဝင်ပါတယ်။ အရိုးကင်ဆာနှင့် အစာအိမ်ကင်ဆာ ဝေဒနာရှင်များသည် နှစ်ချို့ပျားရည်စစ်စစ်နှင့် သစ်ကြပိုးခေါက်မှုန့်တို့ကို ဆတူရော၍ တစ်နေ့ သုံးကြိမ် သောက်ပေးသင့်ပါတယ်။
ချောင်းဆိုးနေသူများအတွက် ပျားရည်သည် ဆေးကောင်းတစ်ခွက်ဖြစ်ပြီး ရေနွေးဖြူ သို့မဟုတ် ရှောက်ရည်/သံပုရာရည်နှင့် ရော၍ သောက်ပေးနိုင်ပါတယ်။ ကိုယ်တွင်းအပူဓာတ်များသူများပင်လျှင် ပျားရည်ကို ရှောက်ရည်ညှစ်၍ သောက်သုံးခြင်းဖြင့် အပူငြိမ်းစေနိုင်ပါတယ်။
ကလေးများအတွက် ပျားရည်က မျက်စိအားကောင်းစေပြီး၊ ချွဲကြပ်ရင်ကြပ်ဖြစ်ပါက သံပုရာရည်ဖြင့် ရောတိုက်နိုင်ပါတယ်။ ဝမ်းပျက်၊ ဝမ်းလျှောခြင်း၊ သူငယ်နာအကြောဆွဲခြင်း၊ တုတ်ကောင်၊ သန်ကောင်ရှိသော ကလေးငယ်များကိုလည်း ပျားရည် အနည်းငယ် (သို့မဟုတ်) နာနတ်သီး၊ အုန်းနို့တို့နှင့် တွဲဖက်၍ ကျွေးပေးနိုင်ပါတယ်။
ပျားရည်သောက်သုံးရန် မသင့်တော်သူများ
အသက်တစ်နှစ်အောက် ရင်ခွင်ပိုက် ကလေးငယ်များကို ပျားရည်ထဲရှိ Clostridium ဗက်တီးရီးယားပိုးကြောင့် လုံးဝ (လုံးဝ) မကျွေးသင့်ပါ။ ၄င်းပိုးသည် ကလေးငယ်များတွင် အစာအဆိပ်သင့်ခြင်းကို ဖြစ်စေနိုင်ပါတယ်။
ဆီးချို၊ သွေးချို ရောဂါသည်များ နှင့် သွေးထဲတွင် Glucose ပြဿနာရှိသူများ သည် ပျားရည်ထဲတွင် Fructose နှင့် Glucose ဓာတ်များ ပြည့်ဝစွာပါရှိနေသောကြောင့် စားသုံးခြင်းမှ အထူးရှောင်ရှားသင့်ပါသည်။
ကိုယ်အလေးချိန် လျှော့ချလိုသူများ သည် ပျားရည်သည် သကြားအညိုထက်ပင် ကယ်လိုရီ ပိုတက်စေသဖြင့် မသောက်သင့်ပေ။
ကိုယ်ဝန်ဆောင်များအနေဖြင့် ပျားရည်သောက်၍ သန္ဓေသားကို ဘေးဥပဒ်မဖြစ်နိုင်သော်လည်း၊ ကိုယ်ဝန်ဆောင်စဉ် သွေးထဲရှိသကြားပမာဏ မြင့်တက်တတ်သဖြင့် ပျားရည်မစားခြင်းက ဘေးအန္တရာယ် အကင်းဆုံးဖြစ်ကြောင်း အကြံပြုလိုပါသည်။
တွဲမစားသင့်သော အစားအစာများနှင့် ပျားရည်အတု/အစစ် ခွဲခြားနည်း
ကြာစေ့၊ မုန်လာဥအဖြူ၊ ဝက်သား၊ ငါး၊ ခိုသား၊ ပဒုမ္မာကြာရွက်၊ ပိန်နဲသီး၊ ဥသျှစ်သီး၊ အုန်းရည်၊ ရှားစောင်းကြီး တို့သည် ပျားရည်နှင့် တွဲဖက်၍ မစားသင့်သော အစားအစာများ ဖြစ်ပါသည်။
ပျားရည်စစ်၊ မစစ်ကို သိလိုလျှင်- ခွေးကျွေးကြည့်ခြင်း (ခွေးမစားပါ)၊ ဝါဂွမ်း သို့မဟုတ် ယမ်းမီးခြစ်ဆံကို ပျားရည်နှစ်၍ မီးရှို့ကြည့်ခြင်း (မီးလောင်လျှင် စစ်သည်)၊ ပျားကို ပျားရည်ထဲ နှစ်ကြည့်ခြင်း (ပျံထွက်သွားလျှင် စစ်သည်)၊ သို့မဟုတ် ငှက်ပျောဖက်ပေါ်တင်ကြည့်၍ လုံး၍ တင်ရှိနေခြင်း စသည့်နည်းလမ်းများဖြင့် စမ်းသပ်နိုင်ပါသည်။ ပျားရည်စစ်စစ်၏ ဂုဏ်သတ္တိမှာ နှစ်ပေါင်းမည်မျှကြာကြာ မပုပ်မသိုး မူလအရသာ အာနိသင်အတိုင်း ရှိနေမြဲ ဖြစ်ပါသည်။
