အမေရိကန်နိုင်ငံ အော်ရီဂွန်ပြည်နယ်၊ ဘီဗာတန် မှာ ဖြစ်သွားခဲ့တဲ့ ဒီအဖြစ်အပျက်က ပုံမှန်ကားခိုးနေကြ ပုံစံတွေနဲ့ မတူဘဲ ရယ်စရာလည်းကောင်းသလို လေးနက်တဲ့ သင်ခန်းစာလည်း ပေးသွားခဲ့ပါတယ်။
ဖြစ်စဉ်ကတော့ ဒီလိုပါ ကားသူခိုးတစ်ဦးဟာ လူမသိအောင် ကားတစ်စီးကို လှစ်ခနဲ ခိုးယူပြီး မောင်းပြေးခဲ့ပါတယ်။ ကားခိုးတယ်ဆိုတာက ရာဇဝ၊တ်မှုပဲ မဟုတ်လား။ ဒါပေမဲ့ ခိုးလာတဲ့ ကားရဲ့ နောက်ခန်းကို လှည့်ကြည့်လိုက်တဲ့အခါမှာတော့ သူ့မှာ ချက်ချင်းမျက်လုံးပြူး သွားရပါတယ်။ ဘာလို့လဲဆိုတော့ မွေးကင်းစ ကလေးငယ်လေးတစ်ဦးက ကားထိုင်ခုံမှာ ငုတ်တုတ်ကလေး ပါလာလို့ပါပဲ။
ကားသူခိုးဟာ ကားခိုးတာလောက်ပဲ လုပ်ချင်ပြီး ကလေးခိုးတဲ့ ပြဿနာမျိုးတော့ လုံးဝမရှုပ်ချင်ခဲ့ပါဘူး။ ဒါကြောင့် တခြားသူခိုးတွေလို ထွက်မပြေးဘဲ ဒီသူတော်ကောင်းသူခိုးကြီးဟာ ယူလာတဲ့ကားကို ချက်ချင်းလှည့်ပြန်ပြီး ကလေးရဲ့ မိခင်ရှိရာ ဈေးဆိုင်ရှေ့ကို အမြန်ပြန်မောင်း လာခဲ့ပါတယ်။
ကားကိုရပ်လိုက်ပြီး ကလေးကို အမေလက်ထဲ လုံခြုံစွာ ပြန်အပ်ပေးပြီးတဲ့နောက် ဒီသူခိုးကြီးက စိတ်မကျေနပ်သေးပါဘူး။ သူဟာ ကလေးအမေကို လက်ညှိုးထိုးပြီး အော်ငေါက် ဆူပူ ပါတော့တယ်။ "ဒီလိုရာသီဥတုနဲ့ ကားထဲမှာ ကလေးကို တစ်ယောက်တည်း ထားခဲ့ရသလား၊ ကလေးကို ဂရုမစိုက်ဘူးလား" ဆိုပြီး အော်ငေါက်ခဲ့ပါတယ်။
သတင်းတွေအရဆိုရင် သူခိုးဟာ ကလေးအမေကို "ခင်ဗျားကို ရဲစခန်းတိုင်ပစ်မယ်" လို့တောင် ခြိမ်းခြောက်လိုက်သေးတယ်လို့ သိရပါတယ်။ ဒီတော့ ကလေးအမေဟာ ကလေးကို ကားထဲမှာထားခဲ့တဲ့ အပြစ်တစ်ခုတည်းနဲ့တင်မကဘဲ၊ သူခိုးရဲ့ အဆူအပူကိုပါ ခံလိုက်ရပါတယ်။
ကလေးအမေကို အော်ငေါက်ပြီးတဲ့အခါမှာတော့ ဒီသူခိုးကြီးဟာ ကလေးကို အမေလက်ထဲ ပေးအပ်ပြီးကြောင်း စိတ်ချလက်ချ သိလိုက်ရပြီးတဲ့နောက် ခိုးထားတဲ့ ကားထဲကိုပဲ ပြန်ဝင်ကာ မောင်းပြေးသွား ခဲ့ပါတယ်။
ဒီအဖြစ်အပျက်ကိုကြည့်ပြီး လူတွေက "ဒီသူခိုးက ဘယ်လိုလူကြီးလဲ? ကားကိုလည်း ခိုးချင်တယ်၊ သူတော်ကောင်းလည်း လုပ်ချင်တယ်" ဆိုပြီး မှတ်ချက်ပေးခဲ့ကြပါတယ်။ ဒါပေမဲ့ တစ်ချိန်တည်းမှာပဲ "သူခိုးတောင် ကလေးလုံခြုံရေးကို စိတ်ပူတတ်သေးတာပဲ" ဆိုပြီး ကလေးတွေကို ကားထဲမှာ တစ်ယောက်တည်း မထားခဲ့ဖို့ ဆိုတဲ့ အရေးကြီးတဲ့ သတိပေးချက်တစ်ခုကိုလည်း အားလုံးကို ပြန်လည်ပေးစွမ်းသွားခဲ့ပါတယ်။
