နွားထိုးကြီးမြို့မှာ လေကြောင်း တိုက်ခိုက်မှု ဖြစ်၊ တယောက် သေဆုံးပြီး ၁၁ ယောက်ဝန်းကျင် ဒဏ်ရာ ရ

အောက်တိုဘာ ၈

မန္တလေးတိုင်း၊ နွားထိုးကြီးမြို့နယ်မှာ ဒီကနေ့ အောက်တိုဘာ ၈ ရက်၊ မနက်ပိုင်းက လေကြောင်းတိုက်ခိုက်မှု ဖြစ်ပွားခဲ့ပြီး တယောက် သေဆုံးကာ ၁၁ ယောက်ဝန်းကျင် ဒဏ်ရာ ရရှိခဲ့တယ်လို့ မြေပြင်ကယ်ဆယ်ရေး လုပ်ဆောင်နေသူတွေက ပြောပါတယ်။

နွားထိုးကြီးမြို့ တောင်ဘက်၊ မကျီးကုန်းရွာရှိ ဘုန်းကြီးကျောင်းမှာ ဒီနေ့ မနက် ၈ နာရီခွဲဝန်းကျင်က လေကြောင်းတိုက်ခိုက်မှု ဖြစ်ပွားခဲ့တာဖြစ်ပြီး တယောက် ပွဲချင်းပြီး သေဆုံးခဲ့တယ်လို့ သိရပါတယ်။

“ဖြစ်စဉ်ကတော့ ဟုတ်ပါတယ်။ မိတ္ထီလာ ရှမ်းတဲလေတပ်ကနေ တက်လာတဲ့ ဂျက်ဖိုက်တာတစီးနဲ့ လေကြောင်း တိုက်ခိုက်သွားတာပါ။ တယောက်ကတော့ နေရာမှာတင် DB (Dead Body) ဖြစ်တယ်။ ဒဏ်ရာရကတော့ လောလောဆယ် ကျွန်တော်တို့ သိထားသမျှက ၁၁ ယောက်လောက် ရှိမယ်။ ဒီထက်လည်း များနိုင်တယ်။ လက်ရှိ ဒဏ်ရာရတွေထဲမှာ ပြင်းထန်အဆင့်တွေလည်း ပါတယ်” လို့ မြေပြင်ကယ်ဆယ်ရေး လုပ်ဆောင်နေသူက ပြောပါတယ်။

အဲဒီ ဘုန်းကြီးကျောင်းမှာ မကျီးကုန်းရွာ ဒေသခံတွေ လာရောက် စစ်ရှောင်နေကြတာလို့ သိရပြီး တိုက်ပွဲတွေကြောင့် ကျေးရွာအတွင်းက နေအိမ်တွေမှာ မနေရဲဘဲ ဘုန်းကြီးကျောင်းထဲမှာ လာရောက် နေထိုင်နေကြတာ ဖြစ်တယ်လို့ သိရပါတယ်။

အဲဒီ မကျီးကုန်းကျေးရွာနဲ့ ၂ မိုင်ခန့်အကွာက စည်ပင်ကျေးရွာဘက်မှာ နလအတပ်နဲ့ ဒေသတွင်း လက်နက်ကိုင် ပူးပေါင်းတပ်တွေ တိုက်ပွဲ ဖြစ်ပွားလျက်ရှိတယ်လို့ သိရပါတယ်။

လက်ရှိမှာလည်း နွားထိုးကြီးမြို့နယ်အစပ်က မလှိုင်မြို့နယ်ရှိ အိမ်ကြီးတောရွာမှာ နလအ စစ်ကြောင်း တကြောင်း ရောက်ရှိနေပြီး စစ်ရေး တင်းမာနေဆဲ ဖြစ်တယ်လို့ သိရပါတယ်။

လက်ရှိ နွားထိုးကြီးမြို့နယ် လေကြောင်း တိုက်ခိုက်ခံရမှုနဲ့ ပတ်သက်လို့ နလအ တာဝန်ရှိသူတွေနဲ့ ဒေသတွင်း လက်နက်ကိုင် တပ်တွေဘက်က သတင်း ထုတ်ပြန်ထားခြင်း မရှိသေးပါဘူး။

အခုရက်ပိုင်းအတွင်း ဒေသအများအပြားမှာ လေကြောင်း တိုက်ခိုက်မှုတွေ ဆက်တိုက်ဆိုသလို ဖြစ်ပွားလျက်ရှိတာမှာ မနေ့ အောက်တိုဘာ ၇ ရက်၊ မနက်ပိုင်းကလည်း မကွေးတိုင်း၊ မြိုင်မြို့နယ် တောင်ပိုင်းက ကျေးရွာတွေနဲ့ မြောက်ပိုင်းက ကျောက်ခွက်ရေနံမှော်မှာ လေကြောင်းတိုက်ခိုက်မှုတွေ ဖြစ်ပွားခဲ့တယ်လို့ သိရပါတယ်။

မြိုင်မြို့နယ် အနောက်ပိုင်း ကျောက်ခွက်ရွာနဲ့ မှန်ရင်းရွာကြားက ကျောက်ခွက်ရေနံမှော် လေကြောင်း တိုက်ခိုက်ခံရမှု ဖြစ်စဉ်အတွင်း နှစ်ယောက် နေရာမှာတင် သေဆုံးခဲ့ပြီး ငါးယောက် ဒဏ်ရာ ရရှိခဲ့တယ်လို့ သိရပါတယ်။

ဒါအပြင် အဲဒီ အောက်တိုဘာ ၇ ရက်နေ့၊ နေ့လယ်ပိုင်းမှာပဲ မြိုင်မြို့နယ်နဲ့ ပေါက်မြို့နယ်အစပ်က သပြေညို ရေနံမှော်ဒေသမှာ လေကြောင်း တိုက်ခိုက်မှု ဖြစ်ပွားခဲ့တယ်လို့ သိရပါတယ်။

Photo - CJ

Credit - Voice of Myanmar News Agency

#သတင်းဟင်းလေးအိုးကြီး