ဂျုံသီးနှံအတွက် ချေးငွေထုတ်ပေးမည်ဟု မြန်မာ့လယ်ယာဖွံ့ဖြိုးရေးဘဏ် ကြေညာ
ရန်ကုန်၊ အောက်တိုဘာ ၃
နိုင်ငံတော်ရဲ့ ဂျုံသီးနှံ တိုးမြှင့်ထုတ်လုပ်နိုင်ရေးအတွက် အားပေးဆောင်ရွက်လျက်ရှိတာကြောင့် ချေးငွေထုတ်ပေးမယ့် အစီအစဉ်ကို မြန်မာ့လယ်ယာဖွံ့ဖြိုးရေးဘဏ်က အသိပေး ကြေညာလာပါတယ်။
ဂျုံသီးနှံစိုက်ပျိုးတဲ့ တောင်သူဦးကြီးတွေထံ ၂၀၂၅ ခုနှစ် ဆောင်းရာသီ စိုက်ပျိုးစရိတ်ချေးငွေမှ စတင်ပြီး သီးနှံချေးငွေတွေကို ထုတ်ပေးသွားဖို့ စီစဉ်ထားတယ်လို့ ဆိုပါတယ်။
ဂျုံသီးနှံချေးငွေကို တစ်ဧကချေးငွေအဖြစ် ငွေကျပ် ၁၅၀,၀၀၀ နှုန်း သတ်မှတ်ထားပြီး တစ်နှစ်ကို အတိုးနှုန်း ၅ ရာခိုင်နှုန်းနဲ့ သက်ဆိုင်ရာ ခရိုင်နဲ့ မြို့နယ်ဘဏ်ခွဲတွေကတစ်ဆင့် ထုတ်ချေးပေးသွားမယ်လို့ သိရပါတယ်။
ဘဏ္ဍာရေးနှင့် အခွန်ဝန်ကြီးဌာန၊ မြန်မာ့လယ်ယာဖွံ့ဖြိုးရေးဘဏ်အနေနဲ့ နိုင်ငံတစ်ဝန်းလုံးက တောင်သူလယ်သမားတွေထံ စိုက်ပျိုးစရိတ်ချေးငွေတွေကို နှစ်စဉ်ထုတ်ချေးပေးလျက်ရှိပါတယ်။
တောင်သူတွေကလည်း သီးနှံပေါ်ချိန်မှာ ချေးငွေတွေ ပြန်လည်ပေးဆပ်ခြင်းနဲ့ လယ်ယာကဏ္ဍ ဖွံ့ဖြိုးတိုးတက်ရေးအတွက် ဘဏ်နဲ့ တောင်သူတွေအကြား နှစ်ဦးနှစ်ဖက် တာဝန်ကျေပွန်စွာ ပူးပေါင်းဆောင်ရွက်ခဲ့ကြပါတယ်။
မြန်မာ့လယ်ယာဖွံ့ဖြိုးရေးဘဏ်အနေနဲ့ စိုက်ပျိုးစရိတ်ချေးငွေတွေကို ထုတ်ချေးရာမှာ စပါးသီးနှံအပါအဝင် သီးနှံ ၂၃ မျိုးကို မိုး၊ ဆောင်း၊ မိုးကြိုရာသီအလိုက် စိုက်ပျိုးချိန်အမီ ထုတ်ချေးပေးလျက်ရှိတယ်လို့ သိရပါတယ်။
ယခုထုတ်ချေးပေးမယ့် ဂျုံသီးနှံစိုက်ပျိုးစရိတ်ချေးငွေတွေ အချိန်မီ ရရှိနိုင်ရေးအတွက် တောင်သူလယ်သမားတွေအနေနဲ့ မြန်မာ့လယ်ယာဖွံ့ဖြိုးရေးဘဏ်၊ သက်ဆိုင်ရာ ခရိုင်/ မြို့နယ်ဘဏ်ခွဲတွေနဲ့ အမြန်ဆုံး ဆက်သွယ်ဆောင်ရွက်ကြဖို့လည်း အသိပေး အကြောင်းကြားထားပါတယ်
