ထိုင်းရောက် အထောက်အထားမဲ့ မြန်မာလုပ်သားတွေအနေနဲ့ CI ကနေ PJ ပြောင်းပြီးပါကလည်း ပြည်ပထွက်ခွာခွင့်မရှိတော့

စက်တင်ဘာ ၂၆

ထိုင်းရောက် အထောက်အထားမဲ့မြန်မာလုပ်သားတွေကိုထုတ်ပေးနေတဲ့ မည်သူမည်ဝါဖြစ်ကြောင်း သက်သေခံ CI စာအုပ်ကနေ Passport for Job (PJ ) ပြောင်းလဲသူတွေကို စာအုပ်မှာ Passport for only Thailand ထိုင်းနိုင်ငံအတွက်သာ သွားလာခွင့်ပြုကြောင်း စာသားကို တုံးထုရိုက်နှိပ်ပြီး ကန့်သတ်လိုက်တယ်လို့ သိရပါတယ်။

CI စာအုပ်အစိမ်းကနေ PJ စာအုပ်အနီ ပြောင်းလဲသူတွေကို ဒီနေ့စက်တင်ဘာ ၂၅ ရက်ကစပြီး ထိုင်းနိုင်ငံအတွင်းသာ သွားလာနိုင်တယ်ဆိုတဲ့စာသားကို ရိုက်နှိပ်ပေးနေတာဖြစ်ကြောင်း ၊ ခုလို နိုင်ငံကူးလက်မှတ်အပေါ် ကန့်သတ်လိုက်တာက နိုင်ငံသားတယောက်ရဲ့အခွင့်အရေးကို ပိတ်ဆို့ကန့်သတ်မှုဖြစ်တယ်လို့ အလုပ်သမားရေးလှုပ်ရှားသူကပြောပါတယ်။

" အခုက ထိုင်းနိုင်ငံဆိုင်မြန်မာသံရုံးက ထိုင်းနိုင်ငံအတွက်သာလို့ရေးပေးလိုက်တဲ့အတွက် အခြားနိုင်ငံတွေကိုသွားလို့လာလို့မရတော့ဘူးပေါ့။အဲဒီအခါကျ ကိုယ်ကထိုင်းကနေ မလေးရှားဖြစ်ဖြစ် စင်ကာပူဖြစ်ဖြစ်တခြားနိုင်ငံတွေကို ကူးသန်းသွားလာစရာရှိတယ်ထားအုံး။တချို့မရှိဘူးပဲထားအုံး ဘာပဲဖြစ်ဖြစ်နိုင်ငံသားတယောက်ရဲ့အခွင့်အရေးကိုပိတ်ဆို့ကန့်သတ်လိုက်တဲ့ စိတ်ပိုင်းဆိုင်ရာနှိပ်စက်မှုကြီးတခုဖြစ်တယ်လို့သုံးသပ်လို့ရပါတယ်။" လို့ မြန်မာပြည်သားများအရေးပူးတွဲလှုပ်ရှားမှုကော်မတီ(JACBA)ရဲ့ ဥက္ကဋ္ဌ ဦးမိုးကြိုးကပြောပါတယ်။

CI စာအုပ်ကနေ PJ ပြောင်းသူတွေကို ထိုင်းနိုင်ငံတခုအတွက်သာ သွားလာခွင့်ကန့်သတ်လိုက်တာကြောင့် ထိုင်းမှတဆင့် တတိယနိုင်ငံကို ထွက်ခွာမယ့်သူတွေအနေနဲ့ ထွက်ခွာခွင့်မရတော့ဘဲ CI နဲ့ PJ စာအုပ်အတူတူပုံစံဖြစ်သွားတယ်လို့သိရပါတယ်။

" ဟုတ်တယ်။မူလဘူတ PJ ဟာတတိယနိုင်ငံထွက်ခွာလို့ရပေမယ့် အခုလို For Thailand only ဆိုတဲ့ကန့်သတ်တားမြစ်ချက်တံဆိပ်တုံးကြောင့်ထိုင်းနိူင်ငံထဲမှာပဲနေရတော့မယ်။" လို့ သူကဆက်ပြောပါတယ်။

လက်ရှိမှာတော့ CI စာအုပ်အစိမ်းကနေ စာအုပ်အနီ PJ ပြောင်းတဲ့သူတွေကိုသာ စာအုပ်မှာ Thailand only ဆိုပြီး ရိုက်နှိပ်ကန့်သတ်နေတာဖြစ်ပြီး ယခင်PJ စာအုပ်သမားတွေတော့ လတ်တလောမှာ မပါဝင်သေးဘူးလို့သိရပါတယ်။

" ထိုင်းကိုရောက်ပြီး တတိယနိုင်ငံထပ်သွားသူ‌တွေများလာလို့ ခုလိုကန့်သတ်တဲ့သဘောလားပေါ့။ ခုလို့ကန့်သတ်လိုက်တော့ CI ကနေ PJ ပြောင်းတဲ့သူတွေက ထိုင်းနဲ့မြန်မာနိုင်ငံကိုပဲ သွားလို့ရမယ့်သဘောဖြစ်သွားတယ်။ CI ရဲ့သဘောက ထိုင်းနိုင်ငံတွင်းသာသွားလာခွင့်ပြုတာဆိုတော့ အဲဒီအတိုင်း CI ကနေ PJပြောင်းလည်း CI လိုပဲသွားခွင့်ကန့်သတ်တာထင်တယ်။အခြေအနေကစောင့်ကြည့်ရအုံးမှာပါ။အခုမဟာချိုင်ကအလုပ်သမားတွေစပြီးတုံးထုခံရ​တာပါ။ " ထိုင်းရောက်မြန်မာတယောက်ကပြောပါတယ်။

CI စာအုပ်ကတော့ ထိုင်းမှာ ရောက်ရှိနေတဲ့ အထောက်အထားမဲ့နိုင်ငံသားတွေကို ပြုလုပ်ပေးတာဖြစ်ပြီး CI စာအုပ်က လေးနှစ်သက်တမ်းရှိတယ်လို့သိရပါတယ်။CI စာအုပ်ကိုင်ဆောင်ထားသူဟာ သက်တမ်းနှစ်နှစ်ပြည့်ပါက CI ကနေ PJ ကိုပြောင်းခွင့်ရှိတာဖြစ်တယ်လို့သိရပါတယ်။

ဓာတ်ပုံ - CJ

Credit - Voice of Myanmar News Agency

#centralnewsnaypyitaw