တစညပါတီမှအမျိုးသမီးကိုယ်စားလှယ်လောင်း(၃၀)ရာခိုင်နှုန်းအထက်ပါဝင်ရန်ဆောင်ရွက်ထားဟုဆို
စက်တင်ဘာ ၂၄
တိုင်းရင်းသားစည်းလုံးညီညွတ်ရေးပါတီ(တစည) အနေဖြင့် လာမည့် ရွေးကောက်ပွဲတွင် အမျိုးသမီးကိုယ်စားလှယ်လောင်း (၃၀) ရာခိုင်နှုန်းအထက် ဝင်ရောက်ယှဉ်ပြိုင်နိုင်ရန်ဆောင်ရွက်ထားကြောင်း ပါတီဥက္ကဌ ဦးဟန်ရွှေက ပြောသည်။
ယနေ့(စက်တင်ဘာလ (၂၄) ရက်) က ရန်ကုန်မြို့၊ ဗဟန်းမြို့နယ်၊တက္ကသိုလ်ရိပ်သာလမ်း၊ အမှတ်(၁၅)၊ကေမ္ဘာဇဝင်း၊တစညပါတီ ဗဟိုပါတီဌာနချုပ်တွင် သတင်းမီဒီများနှင့်တွေ့ဆုံစဉ် မီဒီယာများ၏ မေးမြန်းချက်ကို ဖြေကြားတွင်ပြောဆိုခဲ့ခြင်းဖြစ်သည်။
“အမျိုးသမီးကိုယ်စားလှယ်လောင်းကို အတတ်နိုင်ဆုံး (၃၀) ရာခိုင်နှုန်းပါနိုင်အောင် ကြိုးစားနေပါတယ်။ လက်ရှိမှာ စာရင်းတွေအရ ပြန်စိစစ်တာတွေ လုပ်ဆောင်နေသေးတဲ့အတွက် ဘယ်လောက် ရာခိုင်နှုန်းပါဝင်တယ်ဆိုတာကိုတော့ အခုအချိန်မှာ တိတိကျကျ မပြောနိုင်သေးပါဘူး။ဒါပေမဲ့ အနည်းဆုံး ကတော့ (၃၀) ရာခိုင်နှုန်းလို့ သတ်မှတ်ထားပါတယ် ” ဟု ဦးဟန်ရွှေက ဆိုသည်။
လက်ရှိတွင် ရွေးကောက်ပွဲကော်မရှင်(UEC)သို့ ကိုယ်စားလှယ်လောင်း (၆၉၄)ဦးတင်သွင်းထားပြီး လူငယ်ကိုယ်ကိုယ်စားလှယ်လောင်းလည်း မည်မျှပါဝင်သည်ကို စိစစ်လျက်ရှိကြောင်းနှင့် မိမိတို့အနေဖြင့် ပါတီအတွင်း လူငယ်များပါဝင်လာနိုင်ရေးအတွက် လူငယ်ရေးရာကော်မတီတစ်ရပ်ကိုလည်း ဖွဲ့စည်းကာ ဆောင်ရွက်လျက်ရှိကြောင်း ၎င်းကဆိုသည်။
“တိုင်းရင်းသားစည်းလုံးညီညွတ်ရေးပါတီမှာ လူငယ်တွေ ပါတီနိုင်ငံရေးကိုစိတ်ဝင်စားမှုရှိအောင် ၊နိုင်ငံရေးအပေါ်မှာ ယုံကြည်ချက်နဲ့ သက်ဆိုင်ရာအဖွဲ့အစည်းတွေမှာ ပူးပေါင်းပါဝင် ဆောင်ရွက်နိုင်အောင် ကျွန်တော်တို့ပါတီမှာ Branch တစ်ခုအနေနဲ့ လူငယ်ရေးရာကော်မတီကို ဖွဲ့စည်းပြီး ဆောင်ရွက်နေပါတယ်” ဟု ဦးဟန်ရွှေက ပြောသည်။
တိုင်းရင်းသားစည်းလုံးညီညွတ်ရေးပါတီသည် မြန်မာ့ဆိုရှယ်လစ်လမ်းစဉ်ပါတီမှ မှ ၁၉၈၈ ခုနှစ် စက်တင်ဘာလ (၂၄)ရက်တွင် အမည်ပြောင်းခဲ့ခြင်းဖြစ်ပြီး မြန်မာ့ဆိုရှယ်လမ်းစဉ်ပါတီ၏ အမွေကိုဆက်ခံယူထားသည့် ပါတီဖြစ်ကာ လာမည့်ရွေးကောက်ပွဲတွင် ပြည်ထောင်စုအဆင့် ဝင်ရောက်မည့် ပါတီတစ်ခုဖြစ်သည်။
Credit - NP News Agency
#centralnewsnaypyitaw
