◾️တရုတ်၏မြေရှားထိန်းချုပ်မှုများကြောင့် ဥရောပလုပ်ငန်းအများအပြား ပိတ်သိမ်းရဖွယ်ရှိ
ဥရောပသမဂ္ဂသို့ မြေရှားသတ္တုများတင်ပို့မှုကို မြန်ဆန်အောင် လုပ်ဆောင်ပေးသွားမည်ဟုသာ ဇူလိုင်လက သဘောတူညီချက်ရှိထားသော်လည်း မြေရှားများ နိုင်ငံခြားတင်ပို့မှုကို ပေကျင်းက တင်းကျပ်စွာ ဆက်လက် ထိန်းချုပ်ထားသဖြင့် ဥရောပကုမ္ပဏီအများအပြားသည် ပိတ်သိမ်းရန် သို့မဟုတ်လည်း ဆုံးရှုံးမှုများ ရင်ဆိုင်ရမည့်အခြေဆိုက်နေကြောင်း တရုတ်နိုင်ငံမှ အီးယူ ကုန်သည်ကြီးများအသင်းက ယမန်နေ့တွင် ပြောကြားသည်။
“ ဇူလိုင် ၂၄ ရက်က အီးယူ-တရုတ် ထိပ်သီးအစည်းအဝေးမှာ ရရှိခဲ့တဲ့ သဘောတူညီချက်တွေ နဲ့ ကတိကဝတ်တွေ ဘယ်လိုပဲရှိခဲ့သည်ဖြစ်စေ ကျွန်တော်တို့ရဲ့ အဖွဲ့ဝင်တွေအတွက် တင်းကျပ်တဲ့ထိန်းချုပ်မှုတွေ ဆ က်လက်မြင်တွေ့နေရပါတယ်။” ဟု ကုန်သည်ကြီးများ အသင်းဥက္ကဌ ဂျန်းစ်အက်ကီလန်း က သတင်းထောက်များအား ပြောကြားသည်။
အမေရိကန်သမ္မတဒေါ်နယ်ထရန့် က အခွန်အကောက်များ ကြေညာခဲ့ပြီးချိန်တွင် အချို့သောမြေရှားသတ္တုများနှင့် ဆက်စပ်သံလိုက်များ ပြည်ပတင်ပို့မှုထိန်းချုပ်သည့် အစီအစဉ်များကို ပေကျင်းက မိတ်ဆက်ခဲ့ပြီးနောက် ဥရောပနှင့်အခြားနေရာများမှ ကားထုတ်လုပ်သူများသည် ထုတ်လုပ်မှုနောက်ကျခြင်း၊ လုပ်ငန်းပိတ်သိမ်းရမှုများနှင့် ရင်ဆိုင်နေရသည်။
တစ်ပိုင်းလျှပ်ကူးပစ္စည်းထုတ်လုပ်သူများကလည်း သက်သာခွင့်ပေးရန် ပေကျင်းအား တောင်းဆိုထားသည်။
ကားကုမ္ပဏီများ၊ ကာကွယ်ရေးလုပ်ငန်းများနှင့် အခြားလုပ်ငန်းများတွင် လိုအပ်ချက်မြင့်မားနေသော မြေရှားသတ္တုအများစုကို တရုတ်နိုင်ငံက သန့်စင် ထုတ်လုပ်လျက်ရှိသည်။
၎င်းတို့၏ ပြည်ပတင်ပို့မှုထိန်းချုပ်မှုများမှာ ခွဲခြားဆက်ဆံခြင်းမရှိကြောင်း နှင့် မည်သည့်နိုင်ငံကိုမှလည်း ပစ်မှတ်ထားခြင်း မရှိကြောင်း ပေကျင်းက ကာကွယ်ပြောဆိုသည်။
တရုတ်သမ္မတ ရှီကျင့်ဖျင်နှင့် ဥ‌ရောပကော်မရှင်ဥက္ကဌ အာဆူလာဗွန်ဒါလီယန်း တို့ကြား ဇူလိုင်လ ထိပ်သီးအစည်းအဝေးတွင် ဥရောပကုမ္ပဏီများအတွက် အရေးပါသောကုန်ကြမ်းပစ္စည်းများအတွက် လိုင်စင်ချထားပေးခြင်းကို မြန်ဆန်အောင် လုပ်ဆောင်ပေးသွားမည်ဟု တရုတ်က သဘောတူခဲ့သည်။
ကာလရှည်လိုင်စင်ချပေးရန် သို့မဟုတ် အီးယူသို့ တင်ပို့မှုများအတွက် လိုင်စင်လျှောက်ထားရခြင်း ဖျက်သိမ်းပေးရန် ဥရောပ၏တောင်းဆိုမှုကိုမူ ပေကျင်းက ခွင့်မပြုခဲ့ပေ။
ထိပ်သီးဆွေးနွေးပွဲပြီးနောက် နှစ်လအကြာမှာပင် လိုင်စင်အတည်ပြုပေးခြင်းများ နှေးကွေးသွားကြောင်း အီးယူကုန်သည်ကြီးများအသင်းက ပြောကြားပြီး ၎င်းတို့၏ အဖွဲ့ဝင်များထံမှ တိုင်တန်းမှုများ နှင့် အကူအညီတောင်းခံမှုများပိုများလာကြောင်း အသင်းဥက္ကဌ ဂျန်းစ်အက်ကီလန်းက ပြောသည်။
“ထိပ်သီး အစည်းအဝေးပွဲနောက်ပိုင်းမှာလည်း သိသာတဲ့ ပြောင်းလဲမှု မရှိဘူးလို့ ပြောနိုင်ပါတယ်။” ဟု ၎င်းက ဆိုသည်။
ယင်းနှင့်အတူ လုပ်ငန်းများ ရပ်ဆိုင်းထားရမည့် အဖွဲ့ဝင်ကုမ္ပဏီများ ပိုများလာမည်ဟု အသင်းက မျှော်လင့်ထားသည်။
တရုတ် အကောက်ခွန်ဌာအချက်အလက်များတွင်မှု အမေရိကန် ၊ဥရောပတို့နှင့် သဘောတူညီချက်များ ရရှိခဲ့သည့် ဇွန်လနောက်ပိုင်းတွင် ဥရောပ အပါအဝင် နိုင်ငံရပ်ခြားသို့ မြေရှားသတ္တုတင်ပို့မှုများ မြင့်တက်သွားကြောင်း ပြသနေသည်။
အီးယူကုန်သည်ကြီးများအသင်း ပါဝင်ပတ်သက်ပြီးလျှောက်ထားခဲ့သည့် ပို့ကုန်လိုင်စင် ၁၄၀ အနက် လေးပုံတစ်ပုံအောက်ကိုသာ တရုတ်အာဏာပိုင်များက ခွင့်ပြုပေးခဲ့သည်ဟု ဂျန်းစ်အက်ကီလန်းက ဆိုသည်။
“အဲဒီထိန်းချုပ်မှုတွေကြောင့် ဆုံးရှုံးမှုဖြစ်ပေါ်နေတဲ့ အဖွဲ့ဝင် အများအပြားရှိနေပါတယ်။” ဟု ၎င်းက ဆက်ပြောသည်။
သတင်း-ရဲမင်း
ကိုးကား-Reuters