ပျံသန်းနိုင်သည့် တရုတ်လျှပ်စစ်ကား ၂ စီး လေကြောင်းပြပွဲအတွက် အစမ်းလေ့ကျင့်စဉ် တိုက်မိ
----------------------------------
တရုတ်လျှပ်စစ်ကားကုမ္ပဏီ Xpeng Inc. ၏ လုပ်ငန်းခွဲတစ်ခုမှ ထုတ်လုပ်ထားသည့် ပျံသန်းနိုင်သော လျှပ်စစ်ကား ၂ စီးသည် ချန်ချွန် လေကြောင်းပြပွဲတွင် ပြသရန် စက်တင်ဘာ ၁၆ ရက်က အစမ်း လေ့ကျင့်နေစဉ် လေထဲတွင် တိုက်မိခဲ့ကြောင်း Bloomberg News သတင်းတွင် ဖော်ပြထားသည်။
ဒေါင်လိုက် အတက်အဆင်းလုပ်နိုင်သည့် eVTOLs မော်ဒယ် မော်တော်ယာဉ် ၂ စီးသည် မြေပြင်ပေါ်သို့ ဆင်းသက်ချိန် တိုက်မိခဲ့ရာ ၁ စီး၊ မီးလောင်ခဲ့ပြီး ကျန် ၁စီးသည် မြေပြင်သို့ ဘေးကင်းစွာ ဆင်းသက်နိုင်ခဲ့ကြောင်း Xpeng ကုမ္ပဏီ၏ လုပ်ငန်းခွဲဖြစ်သော Xpeng Aeroht ကုမ္ပဏီ၏ ထုတ်ပြန်ချက်တွင် ဖော်ပြထားသည်။
အဆိုပါ လျှပ်စစ်ကား ၂ စီးသည် လေ့ကျင့်နေစဉ် အလွန်နီးကပ်စွာ ပျံသန်းရာမှ တိုက်မိခဲ့ခြင်းဖြစ်သည်ဟု Xpeng Aeroht က ဆိုသည်။ ယခုဖြစ်ရပ်ကြောင့် အဆိုပါ နည်းပညာ၏ ဘေးကင်းလုံခြုံမှုအပေါ် မေးခွန်းများ ထပ်မံထွက်ပေါ်လာခဲ့ပြီး Xpeng Aeroht အတွက် အနှောင့်အယှက်တစ်ခု ဖြစ်လာနိုင်သည်။
အဆိုပါကုမ္ပဏီသည် ပုံမှန်လျှပ်စစ်ကားနှင့် လေထဲတွင် ပျံနိုင်သည့် eVTOL module ပါဝင်သော EV ကားများကို စတင်ပေးပို့ရန် ပြင်ဆင်နေခဲ့ခြင်းဖြစ်သည်။ ကုမ္ပဏီက အဆိုပါ ကားများကို ၂၀၂၆ ခုနှစ်တွင် အများအပြား ထုတ်လုပ်နိုင်ရန် မျှော်မှန်းထားသည်။
သို့သော် လူအများကို ခရီးတိုအတွင်း သယ်ယူပို့ဆောင်မည့် ထိုသို့သော ပျံသန်းနိုင်သည့် ယာဉ်များ၏ ဘေးကင်းလုံခြုံမှုနှင့် ယုံကြည်စိတ်ချရမှုအပေါ် မေးခွန်းများ ရှိနေဆဲဖြစ်သည်။ အဆိုပါ ကားအများစုကို ကိုယ်တိုင်မောင်းနှင်သူ မပါဘဲသွားလာနိုင်ရန် စီစဉ်ထားသည်ဟုလည်း သိရသည်။
လူမှုမီဒီယာတွင် မျှဝေထားသည့် ဗီဒီယိုများတွင် မီးသတ်ကားများက ပျက်စီးသွားသော eVTOLs ကားပေါ်သို့ မီးငြိမ်းသတ်နေသည်ကို တွေ့ရသည်။ ထိခိုက်ဒဏ်ရာရမှုများနှင့် ပတ်သက်၍ ကုမ္ပဏီက ထုတ်ပြန်ခြင်း မရှိသေးပေ။