မော်လမြိုင်မြို့ပေါ်တွင် ဓါးပြတိုက်မှုဖြစ်ပွား
စက်တင်ဘာ ၁၁
မွန်ပြည်နယ်မြို့တော်ဖြစ်သော မော်လမြိုင်မြို့ပေါ်ရှိ နေအိမ်တစ်အိမ်ကို စက်တင်ဘာလ (၁၁)ရက် နံနက် (၂)နာရီ ဝန်းကျင်ခန့်က ဓားပြတိုက်မှုဖြစ်ပွားခဲ့ကြောင်း ဒေသခံများထံမှသိရသည်။
မော်လမြိုင်မြို့၊ဈေးကြိုရပ်ကွက်၊ ဒေါင်းဇရပ်၊ တက္ကသိုလ်ဖြတ်လမ်း၊ လမ်းသွယ်(၃)ရှိ အိမ်အမှတ်(၅)ကို ဓားပြတိုက်ခဲ့ကြခြင်းဖြစ်ပြီး မျက်နှာဖုံး လက်အိတ် အဖြူ၊ ဘောင်းဘီရှည်အမဲနှင့် ကတ်ဦးထုပ်များ ဝတ်ဆင်ထားပြီး သေနတ်နှင့် ဓားများ ကိုင်ဆောင်ထားသည့် အသက် ၂၀ မှ ၃၀ နှစ်ခန့် ရှိ အမည်မသိလူငယ် သုံးဦးမှ ဓားပြတိုက်သွားခဲ့ခြင်းဖြစ်ကြောင်းသိရသည်။
“ဓားပြတိုက်ခံရတာကိုတော့ သတင်းတွေတက်လာလို့ ကြားမိပါတယ်။ဒီအတိုင်းဆိုရင်တော့ မော်လမြိုင်မြို့ကြီးက တော်တော်ကို စိုးရိမ်ဖို့ကောင်းနေပါပြီ။ လူတွေက ငွေရဖို့အတွက်နဲ့ တော်တော်အတင့်ရဲကြပြီလို့ထင်ပါတယ် ” ဟု မော်လမြိုင်မြို့ဒေသခံတစ်ဦးက ပြောသည်။
ဓားပြများအနေဖြင့် နေအိမ်အတွင်းမှ I phone -16 pro max ရွှေရောင် (၁)လုံး၊ I phone - 14 pro Deep (၁)လုံး၊ IPad Pro (၁)လုံး၊ မီးလင်းလက်ကောက် (၃)ကျပ်သား တစ်ကွင်း၊နှစ်ကျပ်သား မီးလင်းလက်စွပ် တစ်ကွင်း၊ နှစ်ကျပ်သား မီးလင်းဆွဲကြိုး တစ်ကုံး၊သုံးကျပ်သား မီးလင်းဆွဲကြိုး တစ်ကုံးနှင့် ငွေကျပ်သိန်း (၄၀၀) ခန့်တို့ကို ယူဆောင်သွားခဲ့ကြောင်း သိရသည်။
လက်ရှိတွင် အဆိုပါကိစ္စနှင့်ပတ်သက်၍ မော်လမြိုင်မြို့မရဲစခန်းတွင် အမှုဖွင့်လှစ်ထားပြီး အမြန်ဆုံးဖမ်းဆီးရမိရရေးအတွက် ဆောင်ရွက်နေကြောင်း သိရသည်။
Credit - NP News Agency
#သတင်းဟင်းလေးအိုးကြီး
