◼ မက္ကဆီကိုတွင်နှစ်ထပ်ဘတ်စ်ကိုရထားဝင်တိုက်၊ ဆယ်ဦးသေဆုံးပြီး ၆၀ ကျော် ဒဏ်ရာရ
မက္ကဆီကို နိုင်ငံအလယ်ပိုင်းတွင် နှစ်ထပ် ဘတ်စ်ကားတစ်စီးကို ကုန်တင်ရထားတစ်စီးက ဝင်တိုက်မိခဲ့ပြီးနောက် လူ ဆယ်ဦးသေဆုံးခဲ့ကာ ၆၁ ဦး ဒဏ်ရာရရှိခဲ့ပြီး ယင်းဘတ်စ်ကားက မောင်းနှင်လာသောရထားရှေ့ကနေ ဖြတ်မောင်းရန် ကြိုးစားခဲ့ခြင်း ဖြစ်ကြောင်း ရထားကုမ္ပဏီ က ပြောသည်။
သေဆုံးသူများအတွက် ဝမ်းနည်းကြောင်း ရထားကုမ္ပဏီဖြစ်သည့် Canadian Pacific Kansas City de Mexico က မိသားစုများထံ ပြောကြားပြီး ယာဉ်မောင်းများအနေဖြင့် လမ်းဆိုင်းဘုတ်များ နှင့် ရထားလမ်းကူးနေရာများရှိ ရပ်တန့်ရန် ဆိုင်းဘုတ်များကို လေးစားလိုက်နာကြရန် တိုက်တွန်းပြောကြားသည်။
ဘတ်စ်ကားကုမ္ပဏီ Herradura de Plata ကမူ မှတ်ချက်ပေးရန် တောင်းဆိုမှုကို ချက်ခြင်းမတုံ့ပြန်ခဲ့ကြောင်း သတင်းက ဆိုသည်။
အခင်းဖြစ်ပွားရာနေရာမှ ဓာတ်ပုံများတွင် နှစ်ထပ်ဘတ်စ်ကား၏အရှေ့ပိုင်းအထဲသို့ ကျွံဝင်နေပြီး ကိုယ်ထည်လည်း ဆိုးရွားစွာပျက်စီးနေကာ ကယ်ဆယ်ရေးသမားများက ကြိုးနှင့်တားဆီးထားသည်ကို မြင့်တွေ့ရသည်။
မြို့တော် မက္ကဆီကိုစီးတီးအနောက်မြောက်ဘက် ၇၁ မိုင် အကွာရှိ အတာကိုမူကိုမြို့နယ်နှင့် မီချိုအာကန်ပြည်နယ် မာရာဗာတီယို မြို့ကြား စက်မှုဇုန်တစ်ခုတွင် အထက်ပါ ယာဉ်တိုက်မှုဖြစ်ပွားခဲ့သည်ဟု ဒေသအာဏာပိုင်များက ပြောသည်။
အဆိုပါဖြစ်စဉ်တွင်အမျိုးသမီးခုနစ်ဦးနှင့် အမျိုးသား သုံးဦးသေဆုံးသွားခဲ့ကြောင်း မက္ကဆီကို ပြည်နယ် ရှေ့နေချုပ်ရုံးက ပြောကြားသည်။
ဒဏ်ရာရသူအချို့မှာ အခြေအနေဆိုးရွားပြီး အချို့မှာလည်း အချိန်တိုအတွင်း ဆေးရုံမှ ဆင်းသွားနိုင်ကြောင်း ရှေ့နေချုပ်ရုံးက ပြောသော်လည်း အရေအတွက် ကို မပြောပေ။
လက်တင်အမေရိကတွင် ဘတ်စ်ကားတိမ်းမှောက်မှု များ မကြာခဏဖြစ်ပေါ်လေ့ရှိကြောင်း သိရပြီး မက္ကဆီကိုအစိုးရက ၂၀၂၃ ခုနှစ် က နောက်ဆုံးထုတ်ပြန်ခဲ့သည့် ဖက်ဒရယ်အဝေးပြေးလမ်းမပေါ် ဖြစ်ပေါ်ခဲ့သည့် ယာဉ်တိုက်မှု အချက်အလက်များတွင် စုစုပေါင်းယာဉ်တိုက်မှု ၁၂၀၉၉ မှု၊ သေဆုံးသူ ၁၉၀၀ ၊ ထိခိုက်ဒဏ်ရာရသူ ၆၄၀၀ ရှိပြီး ဆုံးရှုံးနစ်နာမှုပေါင်း ကန်ဒေါ်လာ သန်း ၁၀၀ ကျော်ရှိကြောင်း ဖော်ပြထားသည်။
ယခုနှစ်ဖေဖော်ဝါရီလကလည်း ကန်ကွန်ခရီးသွားမြို့မှ တာဘက်စ်ကိုမြို့သို့ ဦးတည်သွားသော ဘတ် စ်ကားတစ်စီးက နောက်တွဲယာဉ်ပါထရပ်ကားတစ်စီးအား ဝင်တိုက်မိပြီး မီးစွဲလောင်သွားခဲ့ရာ လူပေါင်း ၄၀ ကျော် သေဆုံးခဲ့သည်။
ကုန်တင်ရထားပြေးဆွဲမှုများပြားသော်လည်း ရထားဖြင့်ခရီးသွားရန် အကန့်အသတ်ရှိသော မက္ကဆီကိုနိုင်ငံတွင် ဘတ်စ်ကားဖြင့်ခရီးသွားခြင်းကို အများဆုံးအသုံးပြုနေကြရပြီး လက်ရှိတွင် သမ္မတ ကလော်ဒီယာရှိန်းဘောင် ဦးဆောင်သော အစိုးရက နိုင်ငံအလယ်ပိုင်းနှင့် မြောက်ပိုင်းဒေသများသို့ ရထားဖြင့် ခရီးဆန့်နိုင်မည့်ကွန်ရက်ကို တိုးချဲ့ရန် လုပ်ဆောင်နေသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း
