◼ ဆန္ဒပြပွဲများဖြစ်ပွားနေသော နီပေါနိုင်ငံမှ ဝန်ကြီးချုပ်နုတ်ထွက်
နီပေါနိုင်ငံတွင်လူမှုမီဒီယာပလက်ဖောင်းများအားပိတ်ပင်မှုနှင့်အစိုးရ အကျင့်ပျက်ခြစားမှုများကို ဆန့်ကျင်သော အကြမ်းဖက်ဆန္ဒပြပွဲများ ဆက်လက် ဖြစ်ပေါ်ခဲ့ပြီးနောက် နီပေါဝန်ကြီးချုပ် ပရာဆက်ရှားမားအလီ နုတ်ထွက်သွားပြီဖြစ်သည်။
လက်ရှိအကျပ်အတည်းအား အခြေခံဥပဒေဆိုင်ရာအဖြေရှာမှုလုပ်နိုင်ရန် ရာထူးမှ ချက်ချင်း နုတ်ထွက်လိုက်ကြောင်း ဝန်ကြီးချုပ်က ထုတ်ပြန်ပြောကြားသည်။
ယမန်နေ့က လူ ၁၉ ဦး သေဆုံးခဲ့သော ဆန္ဒပြပွဲများဖြစ်ပွားခဲ့ပြီးနောက် လူမှုမီဒီယာပိတ်ပင်မှုများကို ဖယ်ရှားပေးခဲ့သော်လည်း ယနေ့နံနက်ပိုင်းမှစ၍ ဆန္ဒပြပွဲများ ထပ်မံ ဖြစ်ပွားခဲ့ကာ ဒေါသထွက်နေသော ဆန္ဒပြသူများက ထိပ်တန်းနိုင်ငံရေးသမားများ၏ နေအိမ်များကို မီးရှို့ခဲ့ကြသည်။
မြို့တော် ခတ္တမန္ဒူနှင့် အခြားမြို့ကြီးများတွင် နေဝင်မီးငြိမ်းအမိန့် ထုတ်ပြန်ထားလင့်ကစား ဆန္ဒပြသူများက ခတ္တမန္ဒူမြို့ နှင့်အနီးတစ်ဝိုက်ရှိ နိုင်ငံရေးခေါင်းဆောင်များ၏ နေအိမ်များကို မီးရှို့ခဲ့ကြသည်ကို ဒေသခံသတင်းများနှင့် ဗီရုပ်သံများတွင် မြင်တွေ့ရသည်။
မီးရှို့ခံခဲ့ရသည့်နေအိမ်များတွင် နီပေါနိုင်ငံမှအကြီးဆုံးပါတီဖြစ်သော နီပေါကွန်ဂရက်ပါတီ ခေါင်းဆောင် ဘာဟာဒါဒူဘာ၊ သမ္မတ ရမ်ချန်ဒရာပူဒယ်၊ ပြည်ထဲရေးဝန်ကြီး ရာမက်ရှ်၊ နီပေါမော်ဝါဒီပါတီခေါင်းဆောင် ကာမယ်ဒါဟယ် တို့၏ နေအိမ်များလည်း ပါဝင်ကြောင်း သိရသည်။
နီပေါနိုင်ငံတွင် လုပ်ကိုင်နေသော်လည်း အစိုးရပြောကြားသည့်အတိုင်း မှတ်ပုံတင်ခြင်း မရှိသေးသော ယူကျူဘ် ၊ ဖေ့ဘွတ်၊ အင်စတာဂရမ် ၊ WhatsApp နှင့် X ပလက်ဖောင်းတို့၏ မိခင်ကုမ္ပဏီများအား အေပီသတင်းဌာနက မှတ်ချက်ပေးရန် တောင်းဆိုခဲ့သော်လည်း တုံ့ပြန်မှုမရှိကြောင်း သိရသည်။
မှတ်ပုံတင်ထားသော TikTok ၊ Viber နှင့် အခြားပလက် ဖောင်းသုံးခုမှာ ပုံမှန်အတိုင်း လည်ပတ်နေကြောင်း သိရသည်။
ယနေ့ဆန္ဒပြပွဲများအတွင်း လူ နှစ်ဦး သေဆုံးသွားကြောင်း ပြည်သူ့ဆေးရုံ အမှုဆောင်ဒါရိုက်တာ မိုဟန်ရက်မီ က ဘီဘီစီ သတင်းကိုပြောကြားခဲ့ပြီး လောလောဆယ်ဆေးကုသမှုခံယူနေသူ ၉၀ ဦး ရှိကြောင်း ၎င်းက ဆက်ပြောသည်။
အစိုးရဆန့်ကျင်ဆန္ဒပြပွဲများ ထိန်းမနိုင်အောင် ဆက်ဖြစ်နေစဉ် မြို့တော် ခတ္တမန္ဒူမှ ဓာတ်ပုံများတွင် မီးရှို့မှုများကြောင့် မီးခိုးလုံးများတက်နေသည်ကို မြင်တွေ့ရသည်။
ထရီဘူဗန်နိုင်ငံတကာလေဆိပ်တွင်လည်း ပြည်တွင်း ခရီးစဉ်များ လုံးဝ ရပ်တန့်သွာခဲ့ပြီး မြို့တော်ပြင်ပမှ လေဆိပ်များက လုံခြုံရေးမပေးနိုင်သော အခြေအနေများကြောင့် ပြည်တွင်းခရီးစဉ်များ လုံးဝရပ်တန့်လုနီးပါးပင်ဖြစ်ကြောင်း နီပေါ အရပ်ဘက်လေကြောင်းအာဏာပိုင်အဖွဲ့မှ ပြောခွင့်ရသူ ဂါနန်ဒရာဘားလ်က ဘီဘီစီသတင်းကို ပြောကြားသည်။
ထို့ပြင် မီးခိုးများကြောင့် ပြေးလမ်းမြင်ကွင်း မသဲကွဲသော ကြောင့် နိုင်ငံတကာခရီးစဉ်များကိုလည်း လောလောဆယ် ဆိုင်းငံ့ထားကြောင်း သိရသည်။
သတင်း-ရဲမင်း
ကိုးကား-AP/BBC
#နိုင်ငံတကာသတင်း
